25th sun B 1

Tungod kay subong centennial year, luyag ko lang padunggan ang Filipino ilabi na gid ang aton Filipino ingenuity.  Tawgon ko ini nga sermon “only in the Philippines.”  Nagakatabo lang ini sa Pilipinas, ukon sa isa ka pilipino bisan diin man siya.

Una hambalan naton ang aton abilidad:

Kis-a indi ka kapati nga imol man kita sa gihapon tungod kay kung ikomparar mo lang ang aton abilidad sa iban indi kita matupungan.  Tam-an sa aton ka wais, tam-an sa aton kaabilidadan  – amo ini ang pinoy ingenuity at its best.  Diin ka lang abi ka kita  bisan anano na kapadihot sang Comelec agud indi na madayaan, malutsan man sa gihapon sang pinoy.  Diin ka lang kakita nga kung puede man lang ka daya kag kalusot, malusot gid. Kung usaron ta abi ini nga mga abilidad sa kaayuhan. Lantawa bala we can make do with what we have, ang motorcycle nga para lang sa duha ka tawo ginhimo naton nga tricycle para sa 15 ka tawo. Our resiliency in facing difficulties and ingenuity in entertaining ourselves makes us persons who can be happy with anything – halin sa bulang hasta sa paupas damang.  Only a Filipino can think of that.  Apang ang pamangkot subong sang ebanghelyo amo sini:  If we can be so creative in this why can’t we be creative in our relationship with God?  Kon makapalitik kita ulo kon paano makalusot, paano malingaw ang aton kaugalingon, kung paano magdaug sa double sa diin ang tanan mo nga damgo may numero, kung makapalibog kita sing tuman kung paano naton mahatagan sabat ang aton kalibutanon nga problema, ngaa indi kita makapalitik sang aton ulo agud makapalangit?  Ngaa indi naton ini pagusaron agud malab-ot naton ang espirituhanon nga kaayuhan?

Ikaduha, kita nga mga pinoy madamo kita mga virtues, madamo kita maayo nga mga pamatasan.  Isa lang gid ang diperensiya – sa masami misplaced – waay nagasanto, lain ang puntariya.  Kahapos sa aton magkonbensi sa iban nga mag-upod sa katuntuhan.  Kag indi lamang ina, kadali man sa aton magpati kag madala sa katuntuhan, madali kita ma 1-2-3.  Ngaa abi indi naton ini pag-usaron ang aton gift sa pagkonbensi sang iban nahanungod sa kamatuoran imbes nga manunto. Isa pa waay tani problema ang mga pari sa aton ah – hapos kita mamati, hapos kita papatihon.  Ugaling ang luyag naton iya patihan amo ang mga labaylabay – dancing sun, weeping madonna, tubig nga milagrosa, ang mga kano nga manugwali, ang mga healer nga palpak, ang mga manug1-2-3 kag iban pa – ano pa pirme lang kita matuntuhan.  Ari na naman ang VFA ay, patunto naman kita.  Bentaha naton nga mga pilipino indi kita tig-a ulo, desbentaha naton tam-an ini kahumok bisan ano lang ang isulod masulod.

Ikatlo – basta sadya gani damo kita preparasyon.  Sagad sagad sa aton magpreparar . . . basta sadya lang.  Ang piesta nagasugod indi magnubo sa duha ka semana.  Iban isa ka bulan.  Temprano pa sugod na ang bayle, feriahan, miss Desamparados, Mr. And Mrs. Desamparados, may little miss Desamparados, Miss Gay . . . kada gab-i may koronasyon, kada gab-i bayle hasta sa adlaw sang piesta.  Bilib-bilib ka . . . pero basta sadyasadya lang  . . . sa sini nga preparasyon waay gid ta nagkulang.  May isa anay ka cardinal nga italyano didto sa roma, waay siya ka hangop sang pamatasan sang pinoy, luyag niya ipauntat ang aguinaldo nga misa.  Ngaa – siling niya.  They are starting their christmas 9 days before the real christmas, now that’s very early – siyam pa gani ka adlaw nga magkrismas sugod na sila ya.  Sa sadto nga meeting gulpi lang tumindog ang pinoy nga theologian kag nagsiling – sin-o siling sa imo nga 9 days pa lang nagasugod na kami sang krismas ha – hay Septiembre pa lang gasugod na kami ya. 

Aha basta preparasyon sa sadyasadya waay gid makatupong sa aton.

Ngaa abi indi naton ina mahimo sa aton pagtuon agud indi kita magcramming?  Ngaa abi indi naton ina paghimuon sa tion nga may ginapaabot kita nga crisis?  Sin-o sa aton ang nagpungko kag nagplano na nga daan para sa la nina, sa paalbuton nga baha.  Ukon basi mahimo man nga maplanohan naton sing maayo ang aton pagpalangit.

Subong ang aton Ginoo nagasiling, kon may kasubong lang kita nga panimuot sa wais nga enkargado sa ebanghely,o maangkon gid naton ang langit kag ang madamo nga mga espirituhanon nga mga butang.  Kay kon abilidad lang ang paghambalan, kung birtud lang ang hisayran ang pinoy waay kulang – pa wais-wais – wais gid pinoy;  sa abilidad, abilidadan gid ang pinoy;  sa pa-pisan-pisan lang, pisan gid ang pinoy; sa preparasyon abanse gid siya ka tama.  Isa na gid lang ang kulang – indi sakto ang direksiyon.  Tam-an ka manggaran sang pinoy sa iya pamatasan, custombre, tradisyon, abilidad, resourcefulness, intelligence, we have a lot of energy in us – ugaling sa masami waay gid naton gina-usar sa sakto nga bagay. 

As Jesus has said the worldly take more initiative than the otherworldly when it comes to dealing with its own kind.  And in our own case we use our initiative, and resourcefulness so diligently for worldly concerns and only there, but never for the otherworldly.  Now if only we could harness our Filipino ingenuity in order to get to heaven and to gain I our spiritual life, then and only then can we take pride of our talents and our ingenuity and say with pride only in the Philippines.