25th sun B 2

May isa anay ka monghe nga adlaw-adlaw nagpangamuyo nga magpakita ang Ginoo sa iya paagi sa isa ka aparisyon.  Pila na ka tuig ang iya pangamuyo kag paabot sini nga aparisyon, apang waay gid.  Isa ka adlaw sang nagapangamuyo sia sa iya kwarto daw ano kadaku sang iya kalipay nga ang Ginoo nagpakita sa iya nga naupdan sa kasanag.  Katahum sang iya nakita kag nagkalipay sia nga ang iya pangamuyo ginpamatian gid man pagkatapos sang malawig nga mga tinuig. 

Samtang nagalantaw sia sa nawong sang aton Ginoo, sa hinali nagbagting ang doorbell sang monasteryo.  Adlaw yadto nga ang mga nagakinahanglan sa ila palibot nagapalapit sa monasteryo nga nagahatag sa ila sing pagkaon.  Kag sa ano man nga dimalas, sa sadto gid nga adlaw, turno sining monghe ang magpakaon sa ila.  Ang monghe indi kahibalo kon ano ang iya himuon.  Bayaan bala niya ang aparisyon sang aton Ginoo kag pakan-on ang mga ginagutom?  Ukon mapabilin lamang sia dira sa atubangan sang aton Ginoo kag pabay-an ang mga ginagutom? 

Antes mag-untat ang pagbagting sang lingganay nga nagapanawag sa iya, ang tigulang nga monghe nagtindog nga masinulob-on kag ginbayaan ang aparisyon sang aton Ginoo.  Ginkadtoan niya ang mga ginagutom kag iya sila gin-atipan kag ginpakaon.  Pagkatapos sang isa ka oras nagbalik sia sa iya kwarto.  Pag-abri niya sang pwerta nakibot sia nga ang aparisyon yara man sa gihapon, kag sa daku nga kalipay sia nagluhod sa pagpasalamat sa Ginoo sa iya paghulat samtang gin-atipan niya ang mga gingutom.  Ang aparisyon sang Ginoo naghambal sa iya, “Anak ko, kon waay mo gin-atipan ang mga nagakinahanglan, waay man ako kontani nagpabilin.”

Ang aton ebanghelyo may katulad man nga leksiyon.  Matuod katulad sang mga gintuton-an ni Kristo, gintalikdan sadtong monghe ang tanan sa pagsunod kay Kristo, bisan pa ang manggad sang kalibutan.  Apang sa sini nga aparisyon sang Ginoo, nakatuon ini nga monghe sang mas madalom nga leksiyon, katulad man sang natun-an sang mga sumulunod ni Kristo sa aton ebanghelyo – nga ang pinakamaayo kag pinakamataas nga pag-alagad sa Dios indi gid man ang pagka-monghe ukon ang pagkapari ukon ang pagka-madre.  Nga ang pinakamaayo kag pinakamataas nga pag-alagad sa Dios indi gid man ang pagsulod sa monasteryo ukon ang pagpabilin sa simbahan sa bilog nga adlaw.  Ang pinakamaayo nga pag-alagad sa Dios amo ang pag-alagad sa aton mga kautoran nga nagakinahanglan ilabi na gid yadtong nagakinahanglan gid sing labi sang aton bulig.  Ang Ginoo nagsiling, Kon sin-o ang luyag mangin-una, dapat sia magpaulihi sa tanan kag mangin suloguon sang tanan.”

Paano naton ini mabuhat sa aton matag-adlaw nga pangabuhi? 

Indi gid man kita mangin katulad ni Mother Teresa nga naglibot sa bug-os nga kalibutan sa pagpangita sang mga kubos nga iya alagaran.  Pero katulad niya kita makasugod dira mismo sa aton puloy-an, dira mismo sa aton mga kaingod.  Matuod masiling kita “ti, ano gid ang mabulig namon kay imol man kami.”  Ang PCP II nagsiling nga “waay sing imol nga waay sing sarang nga mahatag.”  Matuod ini kay ang kaalwan indi lamang birtud sang mga may sarang.  Ang kaalawan birtud, ilabi na gid sang mga kubos, tungod kay mas nakahangop kita sang kahimtangan sang ginagutom; mas nakahangop kita kag mas nakabatyag kita sang kahimtangan sang masakiton nga waay sing bulong.  Sa pagkamatuod kita man lang ang una nga dapat magbulig sa isa kag isa; kon kita nagahugpong, kon kita nagakabalaka sa kahimtangan sang isa kag isa, kon kita nagtingob sa pagpatigayon sang aton mga kinahanglanon.  Kita man lang ang makabuligay, kita man lang ang makahatag solusyon sa kinahanglanon sang tagsa-tagsa ka pumuluyo sa aton katilingban. 

Kahapon naglibot naman ang mga sobra naton treinta ka mga volunteers sa mga barangay sa pagtipon sa mga pumuluyo didto sa pagpangamuyo.  Ini sa tuyo nga mahugpong naton ang mga pumuluyo agod sila makabuligay sa ila espirituhanon kag matag-adlaw nga kinahanglanon.  Ining hipos nga paglibot sang aton volunteers isa ka pagpahayag nga ang pagtulon-an ni Kirsto buhi – nga ang luyag mangin una dapat mangin ulihi kag mangin suluguon sang tanan.

Subong sa aton Ebanghelyo, ginapadumdom kita nga ang pag-alagad sa isa kag isa ilabi na gid sa mga nagakinahanglan, amo ang pinakamataas nga pagsimba nga mahalad naton sa Dios.  Ipangamuyo naton nga katulad kay Kristo kita mangin suloguon sang tanan, kita handa nga mag-alagad sa isa kag isa.