22nd sun B 3

May obispo anay nga nagpatuman sang reglamento sa bug-os nga diosesis nga ang mga babayi nga nagabulig sa konbento dapat nagapang-idaron sing singkwenta anyos pataas.  gani nakibot ang Obispo sang nagabisita sia sa isa ka parokya kag nadiskobrehan niya nga ang kura paroko nagdumdum nga nagatuman sia sing reglamento kay may duha ka babayi sa iya konbento.  And idad sang duha ka babayi 25 anyos – tungod kay duha sila singkwenta tanan.

Ang isa sa mga kaladlawan kon masinulundon ka sa letra lang sang patakaran amo nga nagakalipat kita sang espiritu kag tinutuyo sina nga patakaran.  Kag sa masami nagakalipat pa gid kita nga may mas mabug-at nga mga reglamento nga ginapatuman sa aton, sa sobra naton ka id-id sa mga galagmay nga mga reglamento..  Kag amo ini ang ginpakita ni Jesus sa mga Fariseo sa aton ebanghelyo.  Kag amo ini ang leksiyon ni Jesus sa aton sa subong nga mga balasahon – kon paano naton hangpon ang mga kasugoan kag paano naton ini ipatuman sa aton kabuhi.

Ang aton kabuhi napuno sang mga kasugoan.  May napulo kita ka sugo, kag may pito pa gid ka sugo sang simbahan.  Dugang diri ang simbahan may 1,752 ka mga kasugoan nga nahamtang sa ginatawag nga Canon Law.  Halin sa inyo puloy-an pakadto sa sini nga simbahan madamo nga mga kasugoan ang dapat naton tumanon – halin sa pagsakay sa jeep asta nga makapungko kita sa simbahan.  Sa paghimo sining aton panimbahon kadamo sang dapat naton ipatuman nga mga reglamento.  Dugang diri madamo pa nga mga pagsulundan nga wala nasulat apang ginatuman naton halin sa pagpanipilyo nimo tubtob sa imo paghusay sang imo buhok.  Ini nga mga pagsulondan nagabulig sa aton pagkabuhi.  Kinahanglanon naton ini agod mangin matawhay ang aton kabuhi kag tayuyon ang aton pagsinalayo.  Apang subong ang Ginoo nagatudlo sa aton kon paano ang isa ka kristiano maglantaw sini nga mga kasugoan, kag paano niya ini ikabuhi.

Una hibaloon naton nga sa pagkadamodamo sang mga kasugoan dapat makilala naton nga may mas importante nga mga tulumanon kag may mga indi gid man importante nga tulumanon.  Indi tanan nga kasugoan pareho ang ila importancia ukon bug-at.  May ara nga mas bug-at akg may ara nga mas mag-an.  Ang pagkilala kon ano ang mas bug-at kag kon ano ang mas mag-an ginatawag naton nga kaalam.

Sadtong Oktubre 1917 ang mga pari sang simbahan sang Russia nagtipon sa pagbais kon ano ang kolor sang bayu nga gamiton sa Misa.  Tudo ang ila binaisay sa bagay nga naagahan ang ila pagdiskusyon sini.  Pagkaaga natalupangdan nila nga komunista na gali ang ila pungsod tungod kay gintapok na ang hari kag ang kongreso sang rebolusyon.  Samtang nagarebolusyon na ang pungsod, nagabaisay pa sila kon ano ang kolor sang ila bayu sa misa.  Ti kundi wala nila nasuksuk ini kay ang mga komunista nga nangin madinalag-on sa rebolusyon nagpasira sang tanan nila nga simbahan.

Kon kaisa daw pareho kita sang mga fariseo nga naga-insistir nga amo gid ini ang sakto, bisan nag id lang gamay nga mga butang baisan kag awayan.  Naga-insistir nga tumanon ang pagpanghugas sang tasa kag kamot apang ginligaran ang hustisya, ang kaluoy, ka gang patawad.  Indi kita katulog kon indi ktia ka novena, apang hamuok man tulog ta sa tunga sang pangurakot, inhustisya, kag gutom nga yara sa aton palibot.  Nagakatubalg kita sa mga gagmay nga mga butang apang wala kita nagakatublag sa mga dalagko nga mga butang.

            Ano gid bala ang matuod nga relihiyon, pamangkot ni Santiago sa aton ikaduha nga balasahon?  Amo ini siling niya, ang pagtatap sang mga ilo kag mga babayi nga balo sa ila kahul-anan  kag ang pagtipig sang kaugalingon nga walay madagta-i sang kalibutan.   Kon indi kita kahibalo maghusga kon ano ang mas mabug-at nga tulumanon mangin Kristiano lamang kita sa ngalan – mga Kristiano nga nagapatuman sang mga gagmay kag witi-witi nga tulumanon sang sa mabug-at nga tulumanon sang paghigugma kag kabalaka.

Isa ka adlaw may isa ka soldado nga nagasakay sa iya kabayo, dasig nga nagadalagan sa pagpamatay sang mga pangontra.  Wala, tuo nga habyog niya sang iya espada.  Sa hinali nagbagting ang lingganay – oracion na.  Kag sa hinali ang soldado nag-untat, nanaog sa iya kabayo, nanguros kag nagpangadi sang oracion.  Pagkatapos sang bagting dali-dali sia nga nagsakay sa iya kabayo kag hinabyog naman ang iya espada sa pagpadayon sang iya pagpamatay.  Amo bala ini ang Kristiano nga luyag naton?

Ikaduha, dapat hangpon naton nga ang fundacion kag kamunuan sang tanan nga mga kausgoan nagikan sa duha ang kasugoan lamang nga nagasiling:  higugmaa ang Dios kag higugmaa ang imo isigkatawo.  Amo ini ang espiritu sang kasugoan – ang espiritu sang tanan nga mga reglamento ka gang ginabasehan sang tanan.

Sa isa anay ka simbahan may nasulat sa atubangan sini nga nagasiling – wala sing pagtuo kundi si Kristo, wala sing kasugoan kundi ang gugma.  Mga utod kadamo sang mga kasugoan apang isa lamang ini ang tinutuyo nila – nga ini magtudlo sa aton sa paghigugma.

Amo ina ang rason kon ngaa si San Agustin nagsiling – magmangin mahigugmaon ka kag ang tanan nga luyag mo buhata.  Ang buot silingon sini amo nga kon nagahigugma kita, kon may paghigugma sa aton tagipusoon ang tanan nga luyag naton sarang naton mabuhat.  Kay kon mahigugmaon ka wala ka gid may mabuhat nga sayop.  Ang matuod nga gugma maga-amar gid sa pagbuhat sing kaayohan sa aton isigkatawo.

Sa pagsugod nagsiling akon nga ang reglamento sang simbahan nagalista sang 1,752 ka mga kasugoan apang ang pinakaulihi sini nagasiling, ang kaluwasan sang kalag amo ang pinakamataas nga kasugoan.  Kon sayuron pa nga sa mga situwasyon nga ang kaluwasang sang tawo makompromiso ang tanan nga kasugoan nga nalista dapat magbulig sa iya sa pagluwas sang iya kalag – kag kon ang mga ini indi na makabulig, ini nga mga kasugoan, pa-untaton ang mga ini para lang maluwas ang kalag.  Para lang maluwas ang kalag, ang tanan sarang mapaiway.  Amo ini ka mapinalanggaon sang aton mahal nga Iloy ang Santa Iglesya..

Mga utod sa sini nga Dominggo ginapadumdum kita sang Dios sang importansya sang kasugoan kag ang maayo nga pagpatuman sini.  Kabay pa nga magpabilin kita nga matinumanon sa mga kasugoan sang simbahan, sang pungsod, sang barangay.  Ang kasugoan pamaagi agud nga kita maghigugma sa Dios kag sa isa kag isa sing mas tampad kag bunayag.