29th sun B 1

Sang mga bata pa kita sang una may hampang kita nga ginatawag pierdi gana – ang pierdi, daug, ang nagapapierdi mangin madinalag-on.  Sa aton ebanghelyo subong ang aton Ginoo may kasubong man nga pamensaron – ang pierdi, daug, ang nagapapierdi mangin madinalag-on.

Sa aton kalibutan subong ang ginatudlo sa aton amo ang magkompetensya.  Kinahanglan malabawan naton ang iban, kinahanglan mas angat kita sang sa iban, kinahanglan mas maayo kita sang sa iban.  Temprano pa sa aton kabuhi ginapakompentensya na kita – halin sang bata pa kita sa aton balay, hasta sa mga grado naton sa iskwelahan.  Bunga ini sang ginatawag nga “survival of the fittest” – maluwas lamang ang pinakamaayo, ang pinakabakod kag ang pinaka-maalam. 

Ini nga panimuot nagahimo sa aton tagipusoon nga matig-a kag nagatudlo sa aton sa pagbaliwala sang mga maluya.  Tungod sini nga pamatasan ginapatay niya sa aton ang pamatasan sa pagbuligay kag sa pagtuytoy, ang pamatasan sa pagkooperar sa isa kag isa agod indi lamang isa ukon pila lang sa aton ang mapasanyog, kundi ang kalabanan kon inid gid man ang tanan. 

Tungod sini nga pamatasan kag panimuot nga ginatuga sang kalibutan sa aton nagtuhaw ang pagpamigos, ang pagtratar sa isa kag isa indi kay isigkatawo kundi daw isa lamang ka butang nga usaron agod magmangin manggaran ang iban.  Tungod sini nga panimuot ang poder kag kagamhanan gina-abusaran, gin-usar indi para sa pagbulig kag sa pag-alagad sa tawo kundi sa pagpamigos kag sa pagpamentaha.

Ang ebanghelyo nagatudlo sa aton nga ang kagamhanan, ang pagdumala isa ka pag-alagad.  Usaron ini agod mabuligan ang nagakinahanglan.  Ginagamit ini agod ang tanan, kag indi lamang ang iban, makaambit sang manggad sang duta.  Usaron ini agod ang tanan nga mga tawo magakabuhi sing matawhay kag mangin malipayon sa ibabaw sang duta.  Ginagamit ini agod manginbabaw ang kaayohan sang tawo – ang kaalwan, ang pag-ulikid, ang pagkooperar kag pagbuligay.

Amo ini ang rason kon ngaa si Kristo nagkari sa kalibutan – agod ang sala ka gang konsekwensya sang sala nga amo ang pagka-sakon kag kadalok – madula sa panimuot sang tawo.

Ipangamuyo naton nga sa aton patililipon makatuon kita sa sining ebanghelyo kag usaron naton ang aton kinaadman sa pagbuligay kag indi sa pagkompetensyahanay.

Pierdi gana – ang pierdi, daug.  Amo ini ang mensahe ni Kristo sa aton – nga sa aton pagpapierdi dira sa aton pag-alagaray kag sa aton pagpugong sang huyog nga mangin labaw pa sang sa iban kita magakabuhi sing mahidaiton kag may paghiliusa.

Sa sining Domingo sang Misyon dumdomon naton nga ini nga panghangkat ginatanyag sa aton, indi lamang para sa aton kaugalingon ukon sa aton katilingban kundi para sa tanan ago dang tinutuyo ni Kristo nga ang tanan maluwas mapadayon naton paagi sa aton pagginawi kag maayo nga mga pamatasan.  Dumdomon man naton ang ang Kristianismo sa una nga siglo naglapnag tungod sang maayo nga pamatasan sang mga Kristiano sa diin ang mga nakakita sa ila nagsiling – tuloka kon daw ano sila maghigugmaanay.