28th sun B 1

Siguro nasandig gid man sa aton natura ang pagka-kapitalista.  Sa tagsa ka hilikuton nga ginapa-obra sa aton ang masami naton nga ginapamangkot, ano ang akon da?  Bisan pa gani sa tagsa ka buluhaton nga ginabuhat naton sa iban sa masami may dala ini nga panghunahuna kon ano ang aton maganar – buhaton ko ini kay basi pila kaadlaw ako naman ang may kinahanglan; buhaton ko ini kay sang ako may kinahanglan sang una iya man ako ginbuligan.

Subong ang aton Ginoo sa aton ebanghelyo nagabaton sining aton disposisyon.  Kahuluya man kon kaisa batunon ini nga pamatasan apang indi naton manegar nga may kasubong kita nga mga intensyon.  Wala ini ginkondenar sang aton Ginoo kay nakahibalo sia nga yara gid man sa aton ang pagkamaiya-iyahon.  Wala gid man sa aton nga makakabig nga puraw gid ang aton tinutuyo, nga kon nagahigugma kita, kon maalwan kita amo lang gid ini ang aton ginapanumdum, amo gid lang ini ang aton intensyon.  Ano pa masami naton sia nga mabatian nga nagatanyag sang mga padya – sang aton maganar pananglitan aton mabuhat ang iya ginapa-obra sa aton.

Mabatian naton sia nga nagasiling – bulahan ang mga imol kay ila ang ginharian sang langit, bulahan ang mapainuboson kay sila magasubli sang kadutaan.  Mabatian man naton sia nga nagasiling, ang nagabiya sang iya amay, iloy kag panimalay para sa akon, magabaton sang mas labaw pa sini.  Kabigon ta daw bata-bata gid man kita sa aton pagtuo kag sa aton pagpakig-angot sa Dios.  Apang wala ini nagakahulugan nga wala kita sing kabilinggan sa mata sang Dios.

Sa aton ebanghelyo subong ang Ginoo nagatanyag naman sang padya.  Wala niya ginhambal kon ano gid ini nga padya apang iya ini ginlaragway.  Kon ang imo kamot magtulod sa imo sa pagpakasala, utda ina. Maayo pa nga magsulod ka sa kabuhi nga isa na lang ang imo kamot sangsa magkadto ka sa impierno, sa kalayo nga wala nagakapalong, nga duha ang imo kamot.  Ini nagakahulugan nga ang aton madangtan sa pagsunod sa iya mas labaw pa sang sa aton ginahatagan importansya diri sa kalibutan. 

Kon ang imo tiil magtulod sa imo sa pagpakasala, utda ina. Maayo pa nga magsulod ka sa kabuhi nga piang sangsa itagbong ka sa impierno nga duha ang imo tiil.  Ini nagakahulugan nga ang iya ginatanyag sa aton mas labi pa ka malahalon sang sa ginakabig naton nga labing mapuslanon diri sa kalibutan. 

Kon ang imo mata magtulod sa imo sa pagpakasala, lukata ina. Maayo pa nga magsulod ka sa Ginharian sang Dios nga isa na lang ang imo mata sangsa itagbong ka sa impierno nga duha ang imo mata.  Ini nagakahulugan nga ang aton madangtan mas maayo pa sangsa pinakamaayo diri sa duta.

Ang punto sang Ginoo amo nga ang padya nga nagahulat sa aton mas labi pa ka importante sang sa aton ginakabig nga importante diri sa kalibutan, sa bagay nga handa kita sa pagpaiway sining mga kalibutanon nga mga butang agod maangkon lamang ang iya ginatug-an sa aton.  Handa kita, sugot kita nga ipaiway ini tanan para sa aton Ginoo.

Ang Ginoo wala nagasiling nga utdon gid naton ang aton mga tiil kag kamot ukon lukaton naton ang aton mga mata.  Sa baylo nagasiling sia nga kon ginapakamahal mo gani ang imo mata, mas pakamalahalon mo ang ginaharian sang langit.  Kon ginapakamahal mo ang imo tiil dapat lang nga mas pakamalahalon mo ang ginharian sang Dios.  labing importante nga maluwas naton ang aton kalag, labing importante nga maluwas naton ang aton kaugalingon, labing importante nga klaro sa aton kon ano ang mas labaw, kon ano ang mas importante sa aton kabuhi.

Si San Ignatio nagsiling nga sa aton mga desisyon sa kabuhi may isa gid lang ka importante nga basehan sini.  Kag ano ini.  Hibaloon naton ang tinutuyo sang Dios sa pagtuga niya sa aton.  Ano ang tinutuyo sang Dios sa pagtuga sa aton?  Sia nagtuyo nga sa pagtuga sa aton diri sa kalibutan aton sia mahigugma sing lubos kag maluwas naton ang aton mga kalag.  Amo ini ang basehan sang aton mga desisyon – nga sa aton desisyon mapakita naton nga ginahigugma naton ang Dios sing lubos, kag ini nga desisyon makabulig sa aton kaluwasan.  Kon ini nga desisyon wala nagapakita sang aton paghigugma sa Dios kag indi ini makadala sing kaluwasan sa akon – indi ina paghimoa.  Kon ini nga desisyon akon ginabuhat tungod kay ginahigugma ko ang Dios sing lubos kag makadala ini sa akon sa kaluwasan, pwes himuon ko ini.  Amo ini ang basehan sang tagsa ka desisyon sang isa ka kristiano.

Ang akon bala pagsimba subong nga adlaw makapakita sang akon lubos nga paghigugma sa Dios?  Ang akon bala pagsimba subong makabulig sa akon sa pag-angkon sang kaluwasan sang akon kalag?  Kon ang sabat huo, pwes buhata ina.

Ang akon bala pagtimalos sa akon mga kaaway makapakita sang akon lubos nga paghigugma sa Dios? Ang akon bala pagtimalos sa akon mga kaaway makabulig sa akon sa pag-angkon sang kaluwasan sang akon kalag?  Kon ang sabat indi, pwes indi ina pagbuhata.

Ang basehan ni San Ignatio makabulig sa aton sa pagpatuman sa aton kaugalingon sang ginahangkat sang Ginoo sa aton subong diri sa ebanghelyo.  Dumdumon naton nga kita gintuga sa paghigugma sa Dios; kita gintuga agod maluwas naton ang aton mga kalag kag makapuyo kita upod sa Dios tubtob sa katubtoban.  Amo ini ang labing importante nga tinutuyo kag wala nga sing iban pa.