6th sunday C

Ang aton Ebanghelyo nagasiling, "bulahan ang mga imol, malipayon ang mga nagalalaw, bulahan ang mga ginagutom kag gina-uhaw sa pagkabalaan."  Malipayon sila, indi lamang sa pihak nga kinabuhi kundi bisan pa sa sini nga tion, sa sini nga oras, bulahan sila, kon sayuron malipayon sila.

Malipayon gid man bala ang mga imol?  Kalabanan sa aton diri subong imol apang sigurado ako nga ang kalabanan sa aton nga mga imol indi gid man malipayon, indi gid man bulahan.  Paano kita mangin matuod nga malipayon kon kita imol?  Paano mangin malipayon ang imol?  Ano ang nagakadapat nga disposisyon sang imol agod mangin malipayon sila?  Duha ka leksiyon.

Una nga leksiyon:  May isa anay ka bana nga nagsiling sa iya asawa:  "Day, pila ka adlaw magatrabaho ako sing tuman kag pila ka adlaw mamanggaranon kita."

Ang asawa nagsabat, "To manggaranon na kita kay nagaupdanay kita nga duha, pila ka adlaw basi makakwarta kita, pero subong manggaranon na kita."

Sa sini nga kalibutan may mas importante pa sang sa kwarta ukon swerte sa negosyo – yara ang pag-abyanay, yara ang aton panimalay.  Indi ang pag-abyanay nga mabakal sang kwarta, indi pag-abyanay nga puro palapaway istorya, apang matuod gid nga pag-abyanay.  Indi sahi sang panimalay nga naga-unongay lamang kita tungod kay kinahanglan ko ikaw kag kinahanglan mo ako, indi isa ka panimalay nga kon pwede lang malayas ako diri, kundi isa ka matuod nga panimalay sa diin ang matuod nga paghangpanay kag pag-unongay yara.  Amo ini ang nagapahalipay sa mga imol.  Amo ini ang nagatawag sa ila nga bulahan.  Amo sini ang nagahatag sa ila sang malahalon nga mga bendisyon nga nagikan sa Dios.  Kalipay nga waay sing pakuno-kuno, waay sing pakita-kita lang, kalipay nga waay nagasuspetsa nga basi kwarta lang sini ang tuyo niya sa akon.

Gani, ang nahauna nga leksiyon nagatudlo sa aton nga mangin malipayon kita nga mga imol tungod kay ginapasulabi naton ang aton relasyon sa isa kag isa, ginapasulabi naton ang panimalay, ginapasulabi naton ang pag-abyanay.  Ang pagkabulahan, ang matuod nga kalipay napasad sa relasyon sa isigkatawo kag indi sa pagkabutang.  Kon amo ini ang imo ginapasulabi, bisan imol ka, malipayon ka.

Ikaduha nga leksiyon:  Si Doña Pura may lima ka salakyan, madamo nga mga kabulig, dako nga balay, kag malapad nga kadutaan.  Manggaranon sia tungod kay yara sa iya ang tanan.  Makakaon sia sing maayo, makalugayawan sia sa iban nga mga pungsod, kag madamo ang iya mga negosyo.  Gani, bisan magkaon sia, daw waay man gid sing makatalanhaga sa iya makita nga mga sud-an.  Kon maglakat sia daw kahapos na man lang sang tanan.  Waay na sing lugar para sa katingalahan sa iya kabuhi.  Waay na sing lugar para sa mga milagro.  Kon may milagro gid man, natabo ina tungod kay isa ka adlaw waay sia obra, kag waay gid man sia obra kay damo na iya kwarta, nagtangla sia sa langit kag nakita niya ang dancing sun.  Ginkodakan niya kag ginpakita sa iya mga abyan, kag nagbaisay sila bilog nga adlaw kon bala milagro gid man ina ukon indi.

Apang ang eksperyensiya sang mga imol sa ila relasyon sa Dios indi tuga sang mga aparisyon ukon mga panan-awan.  Ang ila eksperyensiya yara sa ordinaryo nga hitabo sang ila kabuhi.  “Hay salamat sa Dios may bugas pa kita.  Baw salamat gid kay waay gid Niya kita ginapabay-an. Hay salamat sa Dios, may inugpliti pa ako nga nabilin.”  Ang pagka-imol nagabukas sang aton kaugalingon sa madamo nga mga kahigayunan para sa mga milagro sang Dios, kag amo ina ang makapahalipay – nga may yara nga nagahigugma kag padayon nga naga-atipan sa aton.  Bisan sa mga gagmay nga bagay nga kinahanglanon sa kabuhi, ang Dios maalwan, ang Dios waay nagapabaya.  Ang imol malipayon tungod kay may pribelihiyo sila nga makita ang kaalwan sang Dios kag ang iya pag-atipan.  May pribelihiyo sila nga makakita sang mga milagro kada adlaw.   Ang mga imol malipayon kay ang ila Dios, buhi nga Dios, buhi para sa ila.

Ang ikaduha nga leksiyon amo nga ang Dios amo ang aton matuod nga kalipay.  Mas malipayon kita kon mabatyagan naton kada adlaw ang iya padayon nga pagbulig, padayon nga pagtabang, padayon nga paghigugma sa aton bisan sa mga magagmay nga mga hitabo sa aton matag-adlaw nga kabuhi. 

Kabay nga magtubo sa aton, ang mga mata sang mga imol, ang disposisyon sang mga imol, agod kita mangin mabinatyagon sa panghikot sang Dios sa aton kabuhi, bisan sa ordinaryo nga mga butang.