2nd sunday C

May isa anay ka mag-asawa nga nagpakay-o kag nagpatahum sang ila balay.  Ang una nga plano kuntani amo nga sa isa ka malapad nga dingding sa sala dekorahan sang mga paintings kag mga kwadro.  Apang ang bana nagpamilit nga butangan ini sang daku nga larawan sang aton Ginuo.  Ang asawa nag-ayo nga kuntani iban lang nga picture, pero ang bana nag-insistir gid.  Gani nabutang gid didto ang dakudaku nga larawan sang aton Ginuo sa yadto nga dingding bisan pa nga indi ini luyag sang asawa.

Apang ulihi na lang natalupangdan sang asawa ang mga kaayuhan nga gindulot sining larawan sa ila panimalay kag sa mga bisita nila, kag nagpasalamat siya nga nag-insistir ang iya bana nga ibutang ini nga larawan.  Ngaa ano ang natabo?

May isa anay ka tawo nga nagbesita sa ila balay nga hagi tulok sa sadto nga larawan.  Sang ulihi nagsiling siya sa tagbalay, “Lantawa bala ang Ginuo, waay lang siya nagatulok sa imo apang mabatyagan mo gid nga nagadulot ang iya panulok sa imo.”

May isa naman ka abyan nga nagsiling, samtang ginatulok niya ang larawan, “Kanami bala diri sa imo balay.  Mabatyagan mo gid ang katawhay.”

Kag nanutahan sang asawa nga sa mga sugilanon niya sa mga bisita sa ila balay ang ila ginaistoryahan daw nagalain, nagadalom tungod sang presensiya nga mabatyagan nila nga dala sang larawan.

Gani isa ka adlaw nagsiling ang asawa nahanungod sa nagakabit nga daku nga larawan sang Ginuo sa ila balay, “Amo ini ang akon natalupangdan kung imbitaron mo ang Ginuo sa imo balay.  Nagalain ang tanan, you will never be the same again.”

Mga utod amo man ini ang experyensiya sang bag-o nga kinasal sa aton ebanghelyo.  Gin-imbitar nila si Jesus, ang aton Ginuo sa ila balay and they were never the same again – ginbuhat niya didto sa ila balay ang iya nahauna nga milagro.

Kung husisaon mo ang santos nga kasulatan madamo nga mga bes nga ginimbitar sang mga tawo ang Ginuo sa ila balay kag didto nagbuhat siya sang mga milagro kag pagkatapos sadto naglain ang ila kabuhi, they were never the same again.

Gin-ayo niya sa balay ang ugangan ni Pedro, ginbanhaw niya ang bata nga babayi ni Jairo.  Kag ang kabuhi ni Pedro kag ni Jairo was never the same again.

Ginabiabi ni Zacheo ang Ginuo sa iya balay.  Nadumduman ninyo si Zacheo.  Ang corrupt nga manugsukot sang buwis?  Nagkaon si Jesus sa iya balay kag si Zacheo was never the same again – ginbalik niya ang tanan niya nga ginpangdaya.

May duha ka gintuton-an nga masinulob-on nga nag-agda kay Jesus sa ila balay.  Waay sila kabalo nga si Jesus yadto.  Pagpamihakpihak niya sang tinapay nabuksan ang ila mga mata kag nakilala nila siya.  Kag ang ila kasubo nabaylohan sang pagkinasadya, masyado ka sadya sa bagay nga gindalagan nila ang walo ka kilometro pakadto sa Jerusalem sa pagbalita sa ila mga upod sang ila kasadya nga nabatyagan sang nakita ni Jesus.

Mga ehemplo ini sa santos nga kasulatan nga nagapakita sa aton kung ano ang matabo panganlitan agdahon naton ang Ginuo sa aton balay.  This much that I know siling sang babayi the family was never the same again.

Paano naton agdahon ang Ginuo sa aton balay.

Una, sa praktikal nga bagay, ano ang ginkabit naton nga mga larawan sa aton balay, sa aton mga tiangge.  Ang larawan bala ni Ara Mina, ang larawan ni Richard Gomez, ang larawan sang tanduay rum kag white castle whiskey, larawan bala sang mga artista?  May ginakabit bala kita nga larawan sang aton Ginuo sa prominente nga bahin sang aton balay.  Kis-a may makita ka man tuod pero gamay-gamay tapos ang lain pa kis-a, naga-inguday sila sang babayi nga nagabikini.  Agdaha ang Ginuo kag ang Ginuo lang sa imo balay paagi sa pagkabit sang iya larawan, and mind you, your sfamily will never be the same again.

Ikaduha paano naton ma-agda ang Ginuo sa aton balay.  Isa ka praktikal nga buluhaton amo ang pagpangadi antes magkaon.  Nabuhat bala naton ini ukon pagabot ta sa lamisa inagaway lang kita dayon?  Antes kita magkaon agdaha anay ang Ginuo nga mag-upod sa inyo panimalay.  Magpangadi antes magkaon.

Mas maayo pa gid nga ang pamilya magtipon anay sa pagpangadi sang santo rosaryo.  Pero kung kaisa ka budlay kay kung magtipon kamo tion man ini sang Esmeralda, Esperanza kag kung ano pa nga mga salida sa telebisyon.  Pero amo lang ini ang akon nahibaluan – when you invite Jesus your family will never be the same again.

Sa katapusan gina-agda naton si Jesus sa aton panimalay paagi sa aton maayo nga pagsinalayo dira mismo sa aton balay.  Ang tatay nagapauli sing temprano kag indi hubog.  Ang nanay waay nagapanakit sa iya kabataan kag nagatudlo sang maayo nga pagtulon-an.  Ang kabataan matinumanon sa mga ginikanan kag nagabulig sa mga hilikuton sa balay.  Ang bug-os nga panimalay nagasimba, nagapangamuyo kag nagatahod sa isa kag isa. Paagi sining pagginawi ginaagda naton si Jesus sa aton panimalay.  Kag lantawa bala ninyo when you invite Jesus into your home, your family will never be the same again.