Masami kon magkonprontahanay na gani ang duha ka tawo nga naga-away kag nagabaisay kon sin-o sa ila ang may sala, sa masami ang maka-areglar sang tanan kag ang makapauntat sang pagbinaisay, amo ang mga tinaga, “kon ikaw abi sa akon lugar, maano ka?” Sa masami ang argumento nga ginagamit agud makonbinsi mo ang pihak nga grupo nga kon may sala ka gid man dapat nila ini kalimtan kag patawaron, ang ginagamit nimo nga argumento nagasugod sa sini nga mga tinaga, “kon kamo abi sa amon lugar, maano kamo?” Kag amo ina ang katapusan sang madamo nga magbinaisay, kay kon kamo abi sa akon situwasyon ano ang inyo himuon. Naga-apelar sia sa ginatawag naton nga common experience, sa aton kumon nga experyensia, kay pananglitan mabutang ka man sa sina nga situwasyon, amo gid man ang imo himuon.
Subong amo man ina ang argumento nga ginagamit ni Kristo sa aton. Ginsugdan niya ang iya pagpahayag paagi sang kasubong man nga mga tinaga, “Abi may isa sa inyo.” Kon sayuron pa, ang kahimtangan nga ginasaysay ko sa inyo indi malayo sa inyo personal nga experyensya sa bagay nga bisan kamo makahanop sini nga butang, kay kamo mismo nagabuhat man sini. An appeal to our common experience, the common experience of goodness.
Una nga common experience. Sang nagligad, may besita kami nga pari. Nagkadto sia tungod kay birthday sang isa man ka pari didto sa seminaryo kag may dala sia nga cake. Ugaling sa ano man nga dimalas one day late sia, tapos na ang birthday, sang isa pa ka adlaw. Kon sayuron nagkadto sia nga nagabitbit sang cake kag waay na himos. Kag ano pa gid nga dimalas nagkadto sia sang nagahingapos na ang amon panyaga kag waay na kan-on. Kami nga mga pari didto sa seminaryo nagkarankaran sa kahuya. Ako mismo nagkadto sa kusina kag nagsiling, “dali dali-a ninyo pangita to kan-on kay mahuy-an ta.” Nabutang kami sa alang-alang. Kamo nakaexperyesya man sina siguro, indi bala? Daw sa ano bala nga mawad-an ka sing ka-on sa atubang sang imo bisita. Salamat sa Dios kay may mga seminarista nga may bilin pa nga kan-on kag amo yadto ang ila gin-offer agud indi kami mahuy-an.
Siling ni Kristo, ang Dios amo man sina. Kon may bululigan kag nabutang ikaw sa alang-alang ang Dios indi gid mag-oanginwala sa mga nagapangayo sa iya sing bulig.
Primero ko nga tuig sa pagkapari ginbutang ako nila sa Candlelight, ang pagsulat sa weekly paper sang parokya sang Jaro. Ok lang na ang sulat. Mabudlay man, tuod pero maagwantahan. Ang indi ko maagwantahan amo ang pagpangita sing kwarta. Nawad-an kami kwarta, waay na gid, indi na ako katulog, pirme lang ko gaburingot kag nagapangakig. Budlay matuod, daw masurrender na ako, indi na ako makapadayon. Abi ko anay waay na gid pag-asa. Pero sa ano man nga hitabo, natakod ko man ang tatlo ka tuig kag tunga. Buhi man ako sa gihapon kag pari man ako sa gihapon. Kag pagtulok ko liwat sa sini nga mga experyensya nga gin-agyan ko ang isa sa mga ulihi ko nga sulat sa Candlelight gintiguluhan ko, My God of the last two minutes. Ang last two minutes sa basketball amo ang pinakakululbaan nga tion. Mahimo nga mabutang ikaw sa alang-alang. Kag sa akon kabuhi didto sa candlelight didto ko nakita nga kon ara ka na gani sa alang-alang, ara man ang Dios. Dira mo gid gani sia makita kag mabatyagan ang iya bulig. My God of the last two minutes. Waay ako nagasiling nga mangamuyo lang kita kon ara na kita sa alang-alang. Sa baylo mangamuyo kita pirme, kag sa tion nga alang-alang saligan naton nga ang Dios yara kag indi magpabaya. Siguro nagapamangkot man ang Dios, kon ako abi sa iya situwasyon maano ako? Gani waay sia nagapabaya.
Ikaduha nga common experience. Kon kaisa kanami manomboy no? Baw si talpulano to, binuligan ko, pero sang ako na ang kinahanglan sang bulig waay gid gani bisan sapak na gid lang. Ngaa may mga tawo nga kasubong sini? Kon may kinahanglan sila, nami-nami sila. Kon ikaw naman ang may kinahanglan, lagyo sila. Mga utod, ini nga mga sahi sang tawo dapat gid man nga tomboyon. Mga waay kabalaslan. Kon ikaw abi sa sina nga situwasyon maano ka?
Ngaa kasubong sini ang aton pamatasan. Tungod kay kon mayo kita sa iban nagapaabot man kita, bisan waay ta pa ina ginahambal, nga aayuhan man kita. Kon nangin maalwan ka sa iya, ginapaabot man nimo nga mangin maalwan man sia sa imo. Amo man ini ang ginapaabot sa aton sang Dios, siling ni Kristo. Kon anano man ang aton ginapangayo sa Amay dapat man kita handa sa paghatag sini sa iban. Kon nagapangayo kita sang patawad, pamangkuton naton anay ang aton kaugalingon - nagapatawad man bala ako? Kon nagapangayo kita sang kinahanglanon naton sa matag-adlaw nga tanan, pamangkuton naton ang aton kaugalingon, sa akon kabuhi nangin maalwan man bala ako sa paghatag sang kinahanglanon sang iban? Kon nagapangayo kita nga ayuhon kag hatagan kasulhayan ang akon masakit nga ginabatyag, antes kita mangayo, pamangkuton naton ang aton kaugalingon, nagahatag man bala ako sing alibyo kag kasulhayan sa mga tawo nga nagamasakit ukon ginabug-atan sang problema. Antes kita mangayo kag magpaabot nga sabton, husisaon naton kon bala ang nangayo sa aton, aton man ginsabat. Kon ikaw abi sa sina nga situwasyon, maano ka?
No comments:
Post a Comment