May isa anay ka bata nga palalantaw TV kag ginpadescribe sa iya kon sin-o ang Dios para sa iya. Amo ini ang iya ginsulat: God is like Bayer Aspirin: He works wonders. God is like Safeguard: He gives you round-the-clock protection. God is like coke: he is the Real Thing. God is like Tide: He gets the stain out. God is like Cerelac: He makes you go, grow and glow. God is like San Miguel Beer: Wala ka nang hahanapin pa. God is everywhere, in every corner and he is very near us. Aren’t you glad you know him? Don’t you wish everybody did?
Ining sulat sang bata may katulad nga mensahe sa aton mga balasahon, ang mensahe nga para sa akon amo ang kaundan sang bug-os nga nasulat sa santos nga kasulatan. Kag ano ini nga mensahe: Ang Dios malapit sa iya katawohan- that God is our Father. Sia malapit sa aton, nakahangop sia sang aton balatyagon, naga-upod sia sa aton pagpanglakaton. Ang Dios indi isa ka mapintas nga hukom nga indi makahangop sang kaluya sang iya katawohan. Ang Dios indi malayo sa aton nga daw waay sing labot sa aton kahimtangan. Malapit sia sa aton kag sia involved sa aton kabuhi, kay sia isa ka mahigugma-on nga Amay.
Amo ini ang pinakadaku nga pahayag nga gindala ni Kristo, kag amo ini ang rason kon ngaa ginatawag naton si Kristo nga simbolo nga nagdala sang paghigugma sang Amay sa tunga naton. Paagi sa iya presensiya, iya ginbuhi kag ginhatagan katumanan ang pagka-Amay sang Dios, nga ang Dios malapit sa iya katawohan, nga ang Dios naga-upod sa aton pagpanglakaton, nga ang Dios nagakabalaka sa aton kahimtangan. Kag sa paglakat ni Kristo gintugyan ini nga misyon sa simbahan. Ginhatagan sang misyon ang simbahan nga magpadayon sa pagpakita sini nga simbolo sang pagkalapit kag pagkamainunungon sang Dios nga Amay sa kabuhi sang iya katawohan. The Church is entrusted with the mission to become the sign of the Father’s love and care for his people. Kag tungod sini, ang simbahan dapat magpakita sing masunsun sang paghigugma kag kaluoy sang Amay, kag dapat niya ipakita sing masunsun ang pagkamainunungon sang Amay sa iya katawhan, sa ila pagpanglakaton sa mga nagakalainlain nga situwasyon. Tungod sini nga misyon ang simbahan paagi sa iya mga lideres nagapakita time and again nga indi sila malayo sa mga ginakabalak-an sang iya mga katawhan, nga indi sia estranghero sa situwasyon sang mga tawo. She has to get involved because she has the mission to show the love the Father has for his people.
Tungod sini ang aton mga kaobispohan nagpadala sa aton sing sulat pastoral nga ginatiguluhan, “Lipaya ang akon mga tawo, lipaya sila” kag ini nga sulat nahanungod sa situwasyon sang aton mga overseas workers kag ila ini ginsulat tungod kay ang simbahan may katungdanan sa pag-upod sa iya mga tawo bisan diin sila.
Ang sulat nagasugod sa pagsaysay sang kahimtangan sang aton mga overseas workers kag nagsiling sila nga matuod “madamo nga kaayohan ang mahimo sa pag-obra sa gwa sang pungsod apang nagpaandam sila nga sa tunga sini may madamo man nga nangin biktima sang madamo nga kalautan.” Tungod sini ang mga obispo nagsiling: “Ang bili sa pag-obra sa guwa sang pungsod tama ka taas para lamang sa maayo nga sweldo. Ang pagkadula sang kabuhi, pagkadula sang tawhanon nga dignidad, ang pagnubo sang pangabuhi moral ukon ang pagkaguba sang mga panimalay, tama ka mahal nga balayran.”
Tungod sini nga mga obserbasyon ang aton mga obispo naghangkat sa aton gobierno sa pagbuhat sang mga masunod:
Una, buhaton naton ang tanan agud matapna ang kaimolon kay amo ini ang una nga rason kon ngaa ang mga Pilipino naga-obra sa gwa sang pungsod. Kag ini mabuhat paagi sa husto kag alalangay nga pagpambitanay sang economic resources, incomes kag benefits kag ang pagpauswag sang ekonomiya nga nagapasulabi sang kauswagan sang mga imol.
Ikaduha, ang mga kaobispohan nagahingyo sa gobierno nga tapna-on gid ang mga illegal recruitment kay amo ini ang ginahalinan sang madamo nga mga pag-antos sang aton mga mamumugon sa luwas. Diri sa aton parokya kon kamo biktima sang illegal recruitment ukon may kilala kamo, ireport ninyo dira sa aton Social Action Office ukon kay Fr. Meliton Oso.
Ikatatlo, ginhingyo man sang aton mga obispo ang aton mga embahada sa paghatag sing pinasahi nga pag-atipan kag pag-apin sa mga Pilipino nga naga-obra sa gwa sang pungsod, legal man ukon indi-legal kay bisan matuod illegal sila kinahanglan nga buligan man sila kay sila sa masami ang ginabiktima.
Ikap-at, ang mga obispo naghingyo sa aton gobierno nga hatagan gid sing pinasahi nga pagtamod ang situwasyon sang mga kababayenhan, kay masobra sila sa katunga sang tanan nga mga Pilipino nga nagaulobra sa luwas sang pungsod kag sa masami sila man ang ginabiktima.
Ikalima, ginhingyo man sang mga obispo ang aton gobierno nga ipatuman gid sing maid-id ang bag-o lang naaprobahan nga layi “ang Magna Carta sang mga Overseas Workers.”
Ano karon iya ang obrahon sang simbahan?
Diri ginpangabay gid sang mga obispo nga ang tagsa ka Diocese suno sa hingyo sang PCP II, magpatigayon gid sa paghatag sang pastoral kag social care para sa mga migrant workers kag sa ila panimalay nga nabilin. Diri sa aton Archidiocese may ara kita nga religious organization nga ginatawag naton “WOWRA” ukon “wives of overseas workers religious association” nga nagabulig sa religious kag social needs sang panimalay sang mga overseas workers, kag kon luyag ninyo magpakig-angot sa sini nga hubon magkadto lang sa Bible Center sa La Sallete building sa kilid sang Shoemart sa Iloilo.
Mga utod, ini nga mga tikang nagapakita lamang sa aton nga tanan kita bilang miembro sang simbahan may katungdanan sa pagpakita sang mainunungon nga paghigugma sang Dios sa iya katawohan ilabi na gid subong sa aton mga overseas workers kag sa ila panimalay. indi na naton pagtugutan nga may iban pa nga magasunod sa gin-agyan ni Delia Maga, Flor Contemplacion kag ni Sarah Balabagan. Sa ano man nga kahimtangan, sa nagakalainlain nga pagkinahanglanon our presence must become the loving presence of God the Father for his people. Amo man ini ang paghangkat sa tagsa-tagsa sa aton sa sulat sang aton mga Obispo nga ginlagdaan ni Archbishop Carmelo Morelos, Presidente sang CBCP.
No comments:
Post a Comment