15th sunday C

Ari na naman kita magahambal nahanungod sa gugma. Siguro natak-an na kamo sing pamati sini. Indi kamo magkabalaka kay ako mismo natak-an man maghambal nahanugod sini. Apang talupangdon naton nga ang mga pamatasan nga ginasulit-sulit sang Ginoo sa ebanghelyo amo yanang mga butang nga kabudlay gid man obrahon ukon waay gina-obra. Gani, subong, ang Ginoo nagliwat naman sang iya mandar nga kita maghigugmaanay kay nakahibalo sia nga amo ini ang pinakabudlay nga obrahon kag may madamo nga mga bes nga malipat ang iya sumulunod nga maghigugma, nga amo ang criteria agud nga kita matawag mga Kristiano. Apang subong ang Ginoo waay lamang naghambal sa aton nga maghigugmaanay.  Subong the Lord outlined the specifics of this loving. Ginsabat niya ang pamangkot “Sin-o ang akon isigkatawo, sin-o ang akon pakitaan sang gugma?

Tatlo ka butang ang luyag ko pamalandongan kaupod ninyo sa sining ginpamulong sang aton Ginoo sa pamangkot sang isa ka manunudlo sang Kasugoan.

Una, sin-o ang akon kaingod, sin-o ang akon higugma-on, ukon sa linguahe naton subong,"sin-o ang best friend mo doon?" Antes kita makasabat “siempre ikaw lang” pamati-an naton ang sabat sang aton Ginoo. Paagi sa istorya sang Good Samaritan ginapahayag sang Ginoo sa aton nga ang aton kaingod, ang aton pakitaan sang aton daku nga paghigugma kag pagtamud amo ang tanan nga nagakinahanglan. Indi lamang ang aton paryente, indi lamang ang mga tawo sa diin may kabalaslan kita, indi lamang ang aton barkada ukon mga miembro sang aton grupo, kundi ang tanan nga nagakinahanglan. 

May isa anay ka miembro sang isa ka religious organization nga nagdali-dali pabugal sa iya mga kaupod sang iya "heroic" nga paghigugma. Siling niya, isa ka gab-i sang naga-ulan-ulan, samtang nagadrive sia sang iya salakyan may nalabayan sia nga naabriha nga awto. Ginlabayan lang niya. Sa uluonhan may nakita pa gid siya nga naabriha nga awto, apang ginlabayan lang niya ini. Sa uluonhan pa gid may nakita pa gid sia nga awto nga na flat, labayan lang niya tani apang may nakita siya nga sticker sa likod sang awto nga may nasulat sang ngalan sang iya religious organization. Ginpunduhan niya ini kag ginbuligan. Sa pagsugid niya sini excited gid sia nga daw dalayawon ang iya ginbuhat. Apang kon ini nga istorya ibutang side by side sa istorya sang maayo nga samariahanon, makasiling kita nga indi gid man ini dalayawon. Sin-o lang bala ang aton brad kag sis, yadto lang bala ang miembro sang aton religious organizations. Paano karon ang una nga ginlabayan, ang ikaduha nga ginlabayan? Indi bala sila mga brad kag sis man naton sa Ginoo bisan aglipay sila, bisan protestante sila. Love, siling nila, knows, no boundaries nor social labels. It knows only unhappy people.

Subong man may iban man sa aton nga mapisan gid magbulig sa iban nga mga tawo, iban gani nagakadto pa sa Home for the Aged sa pagbulig ukon sa Asilo de Molo pero indi makatalupangod sang mga tigulang sa aton balay nga kinahanglan sibinan, kinahanglan hungiton kag atipanon. Kon kaisa sa sobra ta nga pagbulig sa iban sa apostolado, waay naton ginatalupangod nga kinahanglan gali kita sang aton kabataan, sang aton kabulig sa balay. Daw pareho kita sang gobierno sang Pilipinas, mapadala sang peace keeping force kon sa diin-diin nga pungsod, indi gani diri makadakop bisan sang mga makawat ukon sang abu sayaff. Dalayawon gid ini kontani nga mga obra, pero anhon ini kon indi naton gani mabuligan ang tawo nga yara na gid gina-atubang naton adlaw-adlaw.

Gani ang panghangkat ni Jesus sa aton pamangkot subong sin-o ang best friend sang mga Kristiano: Si Kristo nagasabat sa aton - ang tawo nga nagakinahanglan sang aton bulig regardless of who he is.

Ikaduha, si Kristo sa iya pag-istorya nagsaysay nga ang samariahanon, sang nakita niya ang makalulo-oy nga tawo, ginpalapitan niya sia kag ginbuligan. Mga utod tanda-i ang tinaga ni Kristo - ginpalapitan niya sia. Importante ini nga tinaga kay sa masami ang aton pirme nga rason kon ngaa waay kita nagabulig kag nagapakita sang gugma sa mga nalisdan amo: “Ti’ waay man sia nagkadto sa akon kag nangayo sang bulig.” ukon “Sia ang may kinahanglan, sia ang makadto sa akon i.” Ang good samaritan iya la-in. Kinadtoan niya kag ginbuligan. Sia ang nagpalapit. Siling ni San Pablo sa iya sulat, “Anticipate each others needs.” Indi paghulata nga magsinggit pa sia tabang, indi paghulata nga mangayo pa kag magpakidluoy sa aton. Anticipate each others needs, kadtoi dayon kag buligi.

Ikatatlo, indi naton pagkondenaron sa gilayon ang pari ukon ang Levita sa istorya. Ngaa ginsiling ko ini? May paktakon ako: Ngaa kuno ang idik kon maglakat nagaduko? Ang idik kon nagalakat nagaduko tungod kay nahuya sia nga ang iya nanay baboy. Mga utod, indi naton pagkondenaron ining pari kag levita sa istorya kay kita amo man sina, pareho gid sa ila. Ngaa? Damo lang kita rason kon ngaa indi kita magbulig. Ang pari waay nagbulig tungod kay may rason sia, maayo nga rason kay may kasugoan sila nga kon magpalapit ang pari sa isa ka bangkay mangin mahigko sila kag indi na sila makahimo sang ila buluhaton bilang pari kon indi sila maghimo sang isa ka semana nga ritual purification. Kag ang bululigan ginasiling nga daw bangkay na lang, gani ang pari may rason kon ngaa indi sia magbulig. Ang Levita nga nagasunod sa pari waay man nagbulig. Ambot kon ano ang iya rason, pero siguro sang pagkakita niya sang pari nga naglabay man lang, nagsiling sia sa iya kaugalingon, “Hm, waay gani nagbulig ang pari, ako pa. Sin-o gid ako nga maglabaw pa sa pari.” Kag nagpadayon man sia sa paglakat. Mga utod, kon kaisa damo man kita rason. Kag ang iban sini nga mga rason maayo gid, religious pa. Apang para sa Ginoo ini nga mga rason is just an escape. Natak-an kita magpagamo. Natak-an kita magsakripisyo. But remember love always entails sacrifice and we are talking here about love.

Waay ako nagasiling nga sa tagsa nga pagpangayo sang bulig hatag kita dayon kon ano ang luyag nila. Kinahanglan man naton ang discernment, ang pagreflect, ang pagkonsulta sa Dios kon bagay gid man bala nga ihatag ko ang ginapangayo niya ukon tudlu-an ko sia, koreheran ko ang iya batasan, hatagan ko sia sang obra, ukon puede ko gani nga ma-completely deny ang akon bulig. Ginasiling ko ini kay sang isa lang ka semana nagaistoryahanay kami sang akon kilala kag ginsingganan niya ako. “Fr. ina nga tawo ginbuligan ko gid ina. Ginpalusot ko ang iya mga papeles agud mabuhinbuhinan ang iya balayran kag mapadali ang iya kinahanglan.” Mga utod indi ini bunga sang paghigugma, kay ginatun-an naton ang tawo nga magtinamad kag magdinaya. Indi ini bulig. Gani importante gid ang ginatawag nga discernment. Kon ginahatag ko ang iya ginapangayo makabulig gid bala ini sa iya, sa iya pagkatawo, sa iya pamatasan.

Sa sining santos nga misa ipangamuyo naton nga kabay pa hatagan kita sing matuod-tuod nga pagkabalaka sa aton isigkatawo nga nagakinahanglan - nga makilala naton sila sa ila kinahanglanon kag waay sing pinili-an, nga mangin mapisan kita sa pagpangita sa ila kag sa pagpalapit sa ila, kag kahibalo kita magpaiway sang mga rason to exempt ourselves from serving our neighbors, kag makahibalo kita mag-discern kon ano ang bulig nga nagakabagay naton nga ihatag sa mga nagakinahanglan.