4th sunday C

May duha anay kay manginalamon.  Ang ngalan sang isa amo si Diogenes. Ang isa naman iya amo si Aristippus.  Sila nga duha tungod kay mangin-alamon sila, ginakabig sang hari nga iya mga advisers.  Ugaling ini Diogenes kung mangayo gani advise ang hari, indi sya ya kahibalo magbutig.  Waay lipod-lipod kag waay liko-liko ginasugid niya sa hari ang kamatuoran bisan pa ini sa masami masakit sa pamatin-an sang hari.  Gani kontra siya sang hari kag tungod sini waay siya ginpaboran, indi siya crony.  Gani nagapangabuhi lang siya nga simple, kag kung kaisa nagamantener na lang sang kan-on kag kung ano lang nga makita niya nga ulutanon.  Si Aristippus iya wa-is.  Ihambal ya lang ang luyag pamati-an sa Hari bisan pa ini kung kaisa butig.  Kabalo gid siya mag-ulo-into kag mag-ulu-itik sa hari bisan pa ini indi tuod.  Tungod sini ara sya ya nagapuyo sa komportable nga palasyo kag nagakaon sang mga malahalon nga pagkaon. 

Isa ka adlaw si Aristippus nga nagasakay sa kabayo kag nagasuksuk sang malahalon nga bayu naglabay sa hayob-hayob ni Diogenes.  “Diogenes,” siling ni Aristippus, “magtuon ka bala nga mag-amuma sa hari agud indi ka magmantener sa imo pobre nga kahimtangan subong.”  Apang si Diogenes nagsabat, “abyan magtuon ka nga magmantener sang isa ka pobre nga pangabuhi kag indi na kinahanglan nga magulo-into sa hari.  Learn to live simply agud to indi ka na magpilitan nga magbutig sa hari.

Ka familiar sini nga batasan indi bala?  Indi man ako political analyst, pero matyag ko amo gid to ang sala ni Erap.  Nagsiling siya “walang kamag-anak, walang kaibigan.”  Hay budlay na para sa pinoy.  Sa pinoy iya puro kamag-anak, puro kaibigan.  Sa masami indi kita kahibalo mang-indi sa aton mga abyan.  Sa masami indi kita kahibalo magsugid sing kamatuoran sa mga tawo sa diin may utang kita nga kabalaslan.  Sa prankahanay nga istorya, sa masami indi kita kahibalo magprangkahanay sa isa kag isa ilabi na gid sa mga tawo nga malapit sa aton, and this causes a lot of problems.  Ang tiko nagatadlong depende kung sin-o ang aton gina-istorya.  Ang law-ay nagatahum depende kung sin-o ang aton ginasugiran.  Ang malain nangin “OK lang” depende kung sin-o ang nagapamangkot.  Ang sala nangin sakto depende kung sin-o ang nagabuhat. 

Ngaa kasubong sini?  It is because we are afraid to be rejected.  Nahadlok kita nga kung magsugid ta sing kamatuoran indi na kita pagkabigon nga abyan.  Nahadlok kita nga kung tawgon naton ang ang law-ay nga law-ay, basi indi na kita pagsapakon.  Nahadlok kita nga kung kabigon naton nga mal-in ang mala-in, basi damo aton madalasa.  Nahadlok kita nga basi kabigon naton nga sala ang sala, madulaan kita sing mga abyan.  Nahadlok kita nga basi sa aton pagsugid sing matuod, hambalon kita, “daw sa others ka, daw maayo ka gid abi, waay ka gid pinagsamahan.”

Tungod sini ang pagbaton sing lagay tawag naton hanap-buhay.  Ang paghatag sang lagay ginahimo naton . . . para ang tanan tawhay.  Ang pag-upod sa barkada bisan pa sa kalainan ginatawag naton pakikisama.   Ang tanan mahimo naton bisan tiko sa ngalan sang pag-abyanay.  Mahilig kita sa kapan-kapan.  Maayo gid kita sa paliko-liko istorya.  Bisan claro na gid nga butig, bisan claro na gid nga kinawatan dampigan pa – ngaa, kay may kinahanglan;  ngaa, kay may kabalaslan.  Ngaa may ginatawag kita nga mga balimbing – tungod kay kung diin ka mas bentaha didto ka – bay-i dira ang kamatuoran, ngaa makaon mo na.  Bay-i da ang prinsipyo, ngaa makapadaog na sa imo sa eleksiyon.

Mga utod ang aton ebanghelyo subong nagapakita sa aton sang opposite sa aton mga pamatasan.  Para kay Jesus, walang kaibigan, walang kamag-anak – waay siya nagpaliko-liko sang istorya sa atubang sang iya mga abyan kag mga paryente.  Ang tiko, tiko; ang lain, lain; ang law-ay, law-ay; ang sala, sala. 

Tani may tinindugan man kita.  Tani matawag man kita nga de-prinsipyo nga mga tawo.  Tani  makapranka man kita sa isa kag isa.  Tani mangin maisog man kita sa paghambal kag sa pag-apin sang kamatuoran bisan pa masakit ang konsequencia.  Tani makapang-indi man kita bisan pa sa aton mga abyan kag mga kautoran.  Tani indi kita mahadlok mag-apin sang sakto kag sang maayo.

Pero ano kita iya subong.  May mga nag-apply anay sa isa ka opisina sang gambling lord. Una nga aplikante gin-interview sang gambling lord – one plus one.  Ang sabat sang applikante two.  Waay siya kapasar.  Ikaduha nga applikante nagsulod – the same question – one plus one.  Ang iya sabat two.  Waay ka pasar.  Ikatlo nga applikante nagsulod.  The same question – one plus one.  Ang aplikante nagsabat, pila gusto mo boss, 3?  Nakapasar siya.  Onli in da pilipines.