Ang aton ebanghelyo subong nagapahayag sa aton sang duha ka dynamics sang aton Christian life. Paagi sa personalidad ni Marta kag ni Maria, ang aton ebanghelyo nagapahanumdum sa aton sang duha ka importante nga sangkap sang kabuhi sang isa ka Kristiano, kag ini amo ang ginatawag naton nga prayer and action. Si Maria nga makita naton nga nagapungko sa tiilan ni Jesus, amo ang simbolo sang pangamuyo. Kag si Marta nga makita naton nga nagaprokorar sang tanan nga kinahanglanon ni Kristo, amo ang simbolo sang action. Wala sing tuyo si Kristo nga paawayon ini nga duha, nga mas maayo ang ginbuhat sang isa sang sa isa, kundi iya kita ginapahanumdum nga dapat ining duha, ang prayer kag action, matagaan sing nagakaigo nga pagbalanse sa aton kabuhi.
Ang prayer kag action duha ka pamakod nga haligi sang aton Christian life sa bagay nga kon waay ang isa ang bilog nga kabuhi sang isa ka Kristiano mangin kulang. Kon gina-emphasize lamang naton ang action kag waay ini ginadala sa pangamuyo, waay kita sing kinalain sa mga social worker. Kon prayer lang kita kag waay sing action, siling ni Santiago mga butigon kita, patay ang aton pagtuo because our faith, our prayer is not matched by a corresponding action.
May isa anay ka babayi nga nagreklamo, “Padre ang bana ko indi ko na gid masarangan, ang akon kabataan indi ko na gid masarangan.” Ginpamangkot ko sia, “ti ano ang imo ginbuhat.” “Ti padre ginapangamuyuan ko man ina sila.” “Ano pa gid ang imo ginbuhat luwas sa pangamuyo.” “Ngaa padre indi pa ina bastante.” Waay gid niya nadumduman nga basi maistoryahan nila ang nagakatabo sa ila kabuhi kag basi masolbar ang problema, ukon basi madiskobrehan man niya kon ano ang iya kakulangan sa iya bana ukon sa iya kabataan nga puede mahatagan sing nagakaigo nga pagsabat. Apang waay niya ini tanan nadumduman buhaton. Nagdangop lang sia sa Dios, ginbuyagyag ang tanan niya nga problema kag hinanakit, kag ginbilin, ginpabay-an nga ang Dios ang magasolbar sang iya problema. Kalulu-oy man ang Dios. Nahimo na lang sia nga reklamohan, pala-utwasan kag manugsolbar sang tanan nga problema sang kalibutan. Apang amo gid bala ini ang kabubut-on sang Dios? Amo lang gid bala ini ang iya luyag nga buhaton naton? Mangamuyo na lang bala kita kag magreklamo sa iya?
May isa anay ka reliyoso nga tawo nga nagalakat pa-uli sa iya balay. Ini nga tawo nakasumalang sa dalanon sang isa ka makaluloy nga bata nga babayi. Nagapungko sia sa dalan, nagalalakot lang ang tulo sang iya sip-on kag luha, gurisnay ang iya dagway kag masyado gid ka makaluluoy. Naglabay ini nga tawo kag natublag sia sa iya nakita. Gani sa pag-abot niya sa iya balay ginsindihan niya ang kandila sa iya altar kag nagpangamuyo. Siling niya: “Ginoo indi bala nagsiling ka nga ikaw isa ka mahiguma-on nga Amay? Indi bala nga nagsiling ka nga ikaw padayon nga naga-atipan sa imo mga ka-anakan? Ti ngaa ginpabay-an mo sia sa iya kinahanglanon? Ngaa waay mo sia gin-atipan sang imo amaynon nga paghigugma? Ano ang ginhimo mo bilang Amay?” Madamo pa ang iya ginpamasol sa Dios, gani gikan sa langit ang Dios waay nakapugong nga maghipos lang. Nagsabat and Dios sa iya nga nagasiling, “Indi ka magsiling nga waay ako may ginhimo. May ginhimo ako. Ginhimo ko ikaw!”
Mga utod, tanan kita ginhimo sang Dios and we are all part of the solution to the problems of the world. But we are slow in solving the ptoblems of our life tungod kay kita nga mga Kristianos kontento na lang nga reklamohan ang Dios sa tanan nga kagamo sang aton kabuhi. Kontento na lang kita nga magpangamuyo kag ipabuhat ang tanan sa Dios nga daw mga bata paya-on. Apang sa istorya naton ang Dios nagsiling - ginhimo ko ikaw. Don’t just pray to me, do something. Pangamuyo ka, pero basli ina sang isa ka nagakaigo nga action. Prayer and action, mga utod, indi naton ini mabulag sa aton kabuhi.
Isa ka praktikal nga tikang ang aton subong pamalandongan agud ining mensahe sang ebanghelyo mangin koncreto sa aton kabuhi subong kag sa buwas kag sa paalabuton.
Ang aton kabuhi subong nga panahon tam-an na gid ka pigado. Ang presyo sang bugas 37 pesos na. Ang pari sa Calinog nagreport nga sa bahin sang iya parokya nakalab-ot na sa 45 pesos ang bili sang bugas. Ang iban sa ila nagalugaw na lang, to make do with what they have. May mga lending facilities ang aton simbahan nga nagareport nga ang mga small vendors indi na makabayad sang ila utang kay tama na gid ka pigado. Kag bisan amo sini subong ang aton kahimtangan, ang aton gobierno nagapahayag sa aton nga may pat-ud gid nga oil price increase. Pat-ud gid kay siling ni Secretary Ruben Torres, the oil price hike is inevitable. Bisan matuod nga nagnubo ang presyo sang langis sa world market, bisan pa nga nagstabilize ang peso against the dollar, pat-ud gid nga magasaka ang langis. Ngaa, tungod kay nadeplete na ang OPSF. Kag ngaa nadeplete ang OPSF? Tungod kay gindugangan nila ang mark up sang ila ganansiya. So pat-ud gid nga magataas ang gasolina agud nga makaganar sing mas daku. Apang paano kita nga mga Pilipino. Paano na lang ang indi na gani makabakal sang 37 pesos nga bugas. Paano na lang ini, kay nakahibalo kita nga kon magtaas ang langis mataas man ang presyo sang tanan. Mangamuyo na lang bala kita. Ihaboy ta lang bala ang aton reklamo sa Dios kag pabay-an sia nga magsolbar sang aton problema para sa aton.
Mga utod, considering sang aton ginpamalandungan kaina nga sa kabuhi sang Kristiano dapat may prayer kag action nga matabo, ano karon ang buhaton naton? Mapabaya lang bala kita kag magreklamo sa Dios, “Lord I can’t take it anymore,” kag husto lang nga manghayhay. Binundying ini nga pagkakristiano. Some action has to take place, a peaceful concerted action that speaks of our Christian resolve.
Akon suggestion lang ini. Buwas nga adlaw may mass action nga pagabuhaton didto sa Rotary Amphitheater a las dos ang takna sa hapon. Magakadto kita didto sa pagpangamuyo, sa pagselebrar sang misa kag sa pagpakita sa aton pangulohan nga talupangdon man nila ang pag-ingos sang tawo, nga indi man sila magmangin bungol kag insensitive sa pag-antus sang mga tawo, nga indi na nila pagpataason ang langis. Buhaton ini sa isa ka Kristiano kag mahidaiton nga pamaagi.
Siguro makibot ang iban sa inyo kon ngaa ginhambal ko ini. Apang amo ini ang paghangkat sang ebanghelyo sa aton. Indi lang kita makareklamo sa Dios sa tanan naton nga ginabatyag, indi lamang kita makapabaya nga magpasaputi. We have to do something. Precisely God made us because we could do something, we are part of the solutions of the problems of our lives, we have to match our prayers with concrete actions. We have to have the characteristics of Mary and Marta in our lives - prayer and action.
No comments:
Post a Comment