11th sunday C

May duha ka sahi sang mga santos base sa ila ginhalinan. May iban nga nagnangin santo tungod kay ang ila ginikanan kag ang kahimtangan sa ila balay nagporma sa ila nga mangin balaan kag himpit sa ila pagtuo sa Dios. Amo ini kanday Sta. Teresita, San Francisco Javier, si San Benedicto kag iban pa.

May ara man nga mga Kristiano nga nagnangin santo tungod sang ila bug-os nga pagtalikod sa ila daan nga pagginawi, pamatasan kag paminsaron. Sila posible nga may mga malain nga ginsugdan, apang tungod sang mga hitabo kag mga pagbinag-binag, gindesisyonan nila nga bayaan nila ini tanan kag magliso pakadto sa Dios. Amo ini kanday San Pablo, San Agustin, San Francisco, San Ignacio, San Carlos de Foucould kag iban pa.

Ini nagapakita sa aton nga ang dalan sa pagpakabalaan wala sing upang kag wala sing sablag nga mahimo nga rason kon ngaa indi kita makapadayon sa sini nga dalan. Ang dalan sa pagpakabalaan bukas para sa tanan. Bukas ini para sa mga una nga nakamulalong, sa mga una nga nakatalupangod bangod sang ila maayo nga pormasyon sa balay. Bukas man ini para sa mga naulihi, sa mga naglisa sa ila dalan, kag sa mga makasasala. Gani, indi kita makasiling nga ulihi na ang tanan, kag indi man naton mahimo nga rason kag pamasol ang kakulang sang relihiyoso nga pormasyon sa aton kabuhi.

May isa anay ka binalaybay nga nagasiling, I am the captain of my soul – ako ang kapitan sang akon kalag. Kon sayuron pa, sa katapusan kon binagbinagon naton, kita gid man kag indi ang aton kahimtangan ang nagadeterminar sang aton kaangtanan sa Dios. Ang aton sabat sa iya pangagda amo ang nagadeterminar sang kahimtangan sang aton kalag.

Siguro yadtong mga santos nga may maayo nga panugod nabuligan gid sa ila pagtubo tungod sang ila matinatapon kag espirituhanon nga mga ginikanan. Apang sa katapusan sila gid man ang naghimo sang desisyon kon bala padayunon nila ang ila pagpanglakaton ukon indi. Ikaw ang kapitan sang imo kalag. Kon ano ang matabo sina wala kita sing basulon pila ka adlaw kundi ang aton mismo kaugalingon kay ang Dios wala nagkulang sa iya pang-agda.

Amo ini ang leksiyon sang aton balasahon subong nga Domingo. Si David nakasala, apang ang Dios wala nagsira sang puwertahan sang pagkabalaan para sa iya. Ang Dios padayon nga nagpangagda sa iya pabalik.

Ang babayi sa aton ebanghelyo makasasala. Apang wala ina nagsira sang ganhaan sang pagkabalaan para sa iya. Siguro naulihi sia, siguro nagpakuribong pa sia kag nagtulutusmaw anay sa sala. Apang sa tunga sini nga kahimtangan naghimo sia sang desisyon nga talikdan ini tanan kag magsabat sa panawagan sang Dios sa iya.

Mga utod, ang Dios padayon nga nagaagda sa aton. Iya kita ginatawag sa pagpakabalaan sang aton kabuhi, sa pagtalikod sa aton mga sala kag pagpabaya, kag sa paglakat sa dalan sang pagkasanto. Himuslan naton ini nga mga tinion kay ang nagaagda sa aton isa ka maluluy-on nga Dios nga handa magpanas sang aton daan nga kabuhi kag maghatag sa aton sang bag-o nga kabuhi.