Saturday, July 21, 2012

corpus christi A - 1


Sa Communist China sa diin ginadumili-an ang pagpractice sang religion may istorya sang isa ka intsik nga pari nga nagapuyo sa isa ka banwa nga nagpakunokuno nga isa ka trabahador.  Paagi sa mga ginkasugtan nga mga sinyal, ang mga katoliko sa sina nga lugar nakahibalo kon ano ang dapat nila buhaton kag kun diin sila makadto sa pagpakigkita sa sini nga pari.  Ang pari magaplastar sa isa ka balaligyaan sa tienda nga nagabaligya sang habon.  Paagi sa sekreto nga sinyal ang mga katoliko magabakal sang habon kag tagaan sila sang pari sang duha ka bilog nga naputos sang papel.  Kag sa tunga sining duha ka habon makita ang nakonsagrahan nga ostias.  Dal-on nila ini sa ila balay, magatipon ang bilog nga panimalay sa lamisa, magapangamuyo sila sing tingob kag ginakalawat ini nga ostias. 

Baptism of the Lord A - 1


May isa anay ka manggaranon nga tawo nga nang-imbitar sang mga big shot sang iya banwa sa isa ka bangkete.  Madamo ang nag-alabot sa sadtong gab-i sa pagtambong sining madu-agon nga sinalosalo.  Didto ang congressman, ang mayor, ang monsignor, ang  mga de buena familya, kag ang mga manggaranon nga nag-abot nga nakasakay sa ila matahum nga mga salakyan. 
Sa sadto man nga gab-i nag-ulan sing mabaskog kag gani basa ang dalan kag madanlog.  Gani, sang pag-abot sang isa ka bisita nga nagasuksuk sang elegante kag malahalon nga bayu, dumalagan siya sa pagpasilong pasaka sa matahum nga balay, kag sa ano man nga dimalas nakadanlog siya kag nabulit gid sang lutak ang iya bayu, kag ang iya nawong.  Ang mga nakakita sa iya nagkadlaw tungod sang iya kahimtangan.  Kag tungod sa dakung kahuya hana na siya kuntani nga magpauli apang hinawiran siya sang tag-iya sang balay, “tiyoy indi ka lang magpauli. Waay na kaso ah.  Kadto ka anay sa akon piesta.”  Apang ang bisita nahuya sa iya kahimtangan kag indi siya makabatas nga makita pa gid siya sang kadam-an kag kadlawan.  Apang ang tagbalay nag-insistir nga magpabilin siya, kag agud indi mahuya ang iya bisita sa pagsulod sa iya balay sa sina nga kahimtangan, waay bala nagkuha ang tagbalay sang lutak sa dalan, ginpahid niya ini sa iya mismo nga bayu, gindamulit ang iya guya sang higko kag hinagad uli ang iya bisita sa pagsulod.  Ang duha nagsulod sa balay nga naga-uyatay sang kamot kag ang iban nga mga bisita waay na gid nakakadlaw liwat sa kahimtangan sadtong tawo.

34th sun A Kristo Rey - 1


Si Kristo hari.  Si Kristo ginakilala naton nga hari.  Ano ang yara kay Kristo, ukon ano ang ginakilala naton nga yara kay Kristo ngaa ginakabig naton sia, ginakilala naton sia nga hari? 
Ang hari may tatlo ka katungdanan.  Una, ang hari legislative, sia ang tagahimo sang kasugoan kag pagsulondan.  Ikaduha, si Kristo hari tungod kay sia executive, sia ang tagapagpatuman sang kasugoan, paagi sa iya kag sa iya pamaagi ginapatuman ang mga kasugoan.  Kag ikatlo si Kristo hari tungod kay sia man ang magahukom, sa iya ang tanan may salabton. 

33rd sun A - 2


Ginasiling nga si Beethoven, ang bantog kag composer, indi kahibalo magpakigbagay sa tawo sa bagay nga wala sia gawa nagapakig-impon sa iban, kag kon may mga social function, husto lang sia magpanimuko sa kilid kay indi sia kahibalo magpakigsugilanon.  One time, ang anak sang iya suod nga abyan napatay.  Iya sia sa gilayon ginkadtuan sa tuyo kontani nga mapasulhay niya ang balatyagon sang iya abyan sa tunga sang iya kasubo kag pagbakho.  Apang pag-abot niya sa balay sang iya abyan husto man lang sia magpungko sa kilid tungod indi man sia kahibalo kon ano ang iya ihambal sa sini nga okasyon.  Sang ulihi nakita niya ang isa ka piano, tumindog sia kag nagpungko didto, kag samtang nagahilibion ang iya abyan naghimo sia sing bag-o nga komposisyon didto mismo kag gintukar ang isa sa mga pinakamatahum nga pisa, isa sa pinakamatahum niya nga elegy nga iya na-compose para sa kamatayon sang anak sang iya abyan.

33rd sun A - 1


Kon ang mga fans sang NBA nagasinggit “I love this game,” ako iya nagasinggit, “I don’t love this game.”  Indi gid ako hilig sa basketball.  Kadamo na ang contra ko tungod sini.  Ginahalin ko ya ang channel kung nagalantaw sila sang basketball kag mangita sang iban.  Ugaling pierdi gid ako - tanan nga mga naupod ko nga mga pari sa convento nanami-an sini nga hampang.  Waay gid ako may mahimo.  Gani kon makita ninyo ako nga nagalagawlagaw sa plaza nga gab-i na, sigurado nagalantaw na to sila sa ibabaw sang basketball.  I don’t love this game.
Ngaa ginsaysay ko ini.  Kagab-i sang ginbasa ko ang aton ebanghelyo subong nahanungod sa mga talento kag abilidad nga ginhatag sang Dios sa aton, nadumduman ko ini nga hampang kag nakapamangkot ako:  ngaa waay ko gid ini naappreciar.  Kahapos sini nga hampang - madamo nga training ang puede ko maintrahan halin sang elementary hasta high school, pero ngaa pinabay-an ko yadto nga mga oportunidad.  Indi man ako putot, makawaras man ako kag makapaniko katulad ni Jawo.  Makadalagan man ako sing madasig basta may nagalagas lang sa akon, napamatud-an ko ini sang ginlagas ako sang ido.  Kagab-i natalupangdan kon ngaa waay ko nadevelop ini nga abilidad.  May duha ka rason.
Una halin sang una isa ini sa mga butang nga waay ko gid ginrisgohan.  Sang gina-train kami hinadlukan ako.  Waay ako nag-intra.  Nahadlok ako nga masiko, naghadlok ako nga makadasma, nahadlok ako nga mamumo ang akon guya sa salog.  Naghadlok ako nga magrisgo sang akon kaugalingon para sa sini nga hampang. 

32nd sun A - 2


Foolish virgins - ang translation diri buang-buang nga mga dalaga, diminutive noun sang buang - dugang dugangan mo lang gamay, buang na.  Indi gid man ini sila siguro buang-buang gid ah - siguro dula lang puede na - dula nga mga dalaga, waay sila ka prekatar.  Sa mga pamatan-on subong ang ila expression sini amo sini - knock knock  - hello there - kon sayuron dula ka - dula ka sa istorya, la-in imo sugpon sa istorya, lain ang imo paghangop, namuragmuragan - dula. 
For example:  may isa anay ka tatay.  Ginatudluan niya ang iya anak sang iya assignment.  “Tay tay ano gani ang escalator a?”  “Toto ang escalator amo ina ang hagdan nga automatic nagasaka ukon nagapanaog - hagdan nga indi ka na kinahanglan nga magtikang.”   Tango tango ang bata:  “Ti tay ano na ya gani ang elevator.”  “Anak ang elevator amo na ya ang gamay nga kwarto nga nagapasaka panaog automatic - masulod ka lang dira, matindog lang puede ka na ka saka ukon ka panaog, sa first floor sa second floor.”  Ahh siling sang bata - “ti tay ano na iya ang calculator.”  Nanumdum ang tatay “calculator, ambot ‘to ah, ano abi kay waay pa ako ka agi sakay sa calculator.”  Sakay sa calculator -  Knock knock - namuragmuragan, waay ka prekatar - dula.

32nd sun A - 1


Meanings can be explained sometimes by their opposite.  Luyag nyo mahibaluan kung ano ang kahulugan sang foolish bridesmaid lantawon naton kung ano ang wise bridesmaids.  Ang opposite sang foolish virgins amo ang wise virgins – ang opposite sang buang buang, sa hiligaynon nga translation is mainandamon.  Wise means mainandamon.  Kag amo ini ang luyag ko nga pamalandongan – ang pamatasan sang mainandamon nga mga babayi.  Mainandamon.  Katahom ini nga translation tungod kay nagahatag ini sa aton sang matuod nga kahulugan sang kaalam.  It means that in the gospel to be wise is to be prepared.  To be all wise is to be always prepared - sa simple nga tinaga ang matuod nga maalam amo ang maayo nga boy scout ukon girl scout - laging handa.