May isa anay ka pari kag nagsugid sini. Nagamisa sia. Sa tion na sang pagbasa sang mga balasahon,
ang manugbasa nagtindog nga daw ginakulbaan kag nagkadto sa pulpito. Nagsiling siya, “Balasahon gikan sa sulat ni San Pablo sa mga
taga-Corito.” Na shock ang pari kay
imbes ang Corinto, nahimo na lang nga Corito.
Gani nagsinggit siya sa manugbasa - “kulang, kulang.” Ang manugbasa nga ginkulbaan na gid tapat nagsiling
“Mga untod” - gindugangan niya sang n
ang utod imbes sang Corito.
May isa anay ka pari nga pagkatapos sang malawig nga supot
supot nakabakal sang salakyan nga 4X4.
Sa likod sining nagabanaag nga salakyan may na-imprinta nga 4X4 - 4 ekis
kag 4. Ginparking niya ini sa ciudad kag
ginbayaan. Pagbalik niya ang iya
salakyan may agi na sang lansang. Sa kilid
sang sulat nga 4X4 ginsulatan sang bata nga bag-o lang siguro makatuon
magmultiply, sang equals 16. Namula ang
pari sa kaakig. Gani gindala niya sa talyer kag ginpapintahan liwat. Kag agud to nga indi na maliwat nga masulatan,
ginpapintahan na gid niya 4X4=16. Siling
niya - “indi na ni pagkuritan kay ginbutangan ko na gid sang answer.” Isa ka adlaw ginpark naman niya liwat sa
ciudad kag sa pagbalik niya nabuy-an niya ang iya dala sa kakibot. Sa kilid sang ginpapintahan niya nga 4X4=16
may agi liwat sang lansang nga sinulat sang bata - may check nga kon sayuron
sakto ang sabat kag sa ibabaw may sulat nga VG kon sayuron very good kay
nahibaluan ni father ang answer.
Ngaa ginasugid ko ini?
Mga utod, mga samples of joy ini sa amon pagkapari, tungod kay sang
nagligad may nabati-an ako nga nagmuno nga kaluluoy man kuno kami nga mga pari
kay waay kami sing pangalipayan. Mga
utod, kon indi kami malipayon pues isa ina ka indikasyon nga waay kami
nagasunod kay Kristo - kay ang pangagda ni Kristo suno sa ebanghelyo isa ka
pangagda sa punsiyon, isa ka panganda sa pagkinalipay. Gani ang pagsunod kay Kristo isa ka malipayon
nga pagsunod. Tandaan naton ini mga
utod, bisan anano ang estado sang aton pangabuhi, kon pirme lang kita
nagapamurogso, ukon nagapanghayhay tungod sang mga problema, kon pirme lang
nagasarampok ang aton kilay tungod sang ka-ugot kag tungod sang mga sayup nga
aton nakita sa iban, then we have to
re-examine again our Christian life - tungod kay kon indi kita sa masami malipayon
basi la-in ang aton ginasunod, kag la-in ang aton gina-agyan, kay ang pagsunod
kay Kristo malipayon nga pagsunod, kay ang iya pang-agda sa aton, isa ka
pang-agda indi sa paghagi ugtas kundi sa isa ka punsiyon - sa isa ka malipayon
nga kabuhi.