Gugma na naman ang topiko sang aton mga balasahon. Sulit sulit - gugma nga gugma - bal-an ta na
ini, indi bala? Pero ngaa nabudlayan gid
kita maghigugma? Gani subong imbes nga
pagahambalan naton ang pagkakinahanglanon sang gugma, hambalan naton kon ngaa
nabudlayan kita sa paghigugma, agud masunod naton ang ginakratola sang army
dira sa bangga pakadto sa Dingle “bawasan ang salita, dagdagan ang gawa.”
Sugdan naton. Kalabanan
sa aton diri nagalantaw sang Marimar.
Usaron naton ina sa aton pagpamalandong sang aton mga balasahon paagi sa
pagsabat sang pamangkot - ngaa nabudlayan si Sergio maghigugma kay Marimar,
ukon ngaa nabudlayan si Marimar magpabutyag sang iya paghigugma kay Sergio? Kag sa aton pagsabat sini mamangkot kita sa
aton kaugalingon: may kaangid bala ang
akon pamatasan sa ila sa bagay nga nabudlayan man ako subong maghigugma?
Una nga kabudlayan: ano gid bala ang ginsuguran sang ila
gamo - ano gid bala ang naghatag sa ila sang kagamo sa ila paghigugmaanay. Amo ini:
indi siya katulad naton - she is not like us. Si Sergio haciendero, si Marimar sang una
imol. She is not like us. Ngaa kabudlay sa aton maghigugma sa aton
isigkatawo - because she or he is not like us.
Muchacha siya, amo ako - taga-uma siya, taga-ciudad ako; imol siya
manggaranon ako; taga-PCAS siya taga CIC ako; uli-anon siya, maayo pa ang pinsar
ko; maalam ako, mango siya; buki siya ako iya decente; makasasala siya
sulosantoson ako; never heard ang iya apellyedo ako de buena familya, indi
magsanto ang amon paminsaron. He is not
like me.
Apang sa aton nahauna nga balasahon ang Ginuo nagsiling
higugmaa ang mga dumuluong - ang mga lain sang sa imo. Ngaa? Subong
nga semana makadto kita tanan sa patyo.
Husisaa ninyo ang ngalan sa mga lapida - mga politiko, mga pamilya nga sang
buhi sila indi gani makatulokay kag indi makapalapit sa isa kag isa - pero subong inguday na sila sa isa ka
ectarya nga lote - kon makahulag sila puede gani sila makakuhitay. Lantawa ninyo ang diperensiya sang tul-an ni
Dona Pura kag ni Meling nga iya muchacha - himutadi, busisi-a, may kinala-in
bala? Apang ngaa ginatugutan naton ang
panghunahuna nga lain siya sang sa akon nga maga-upang sa aton sa paghigugma,
kon waay man lang gali sing kinalain sa isa kag isa?