Kon
madumduman ninyo sa pagbunyag, ang una gid nga ginabuhat sang pari, sang mga
ginikanan kag sang maninoy kag maninay amo ang pagmarka sa Krus sa agtang sang
bata kag gina-updan ini sang mga tinaga sang pari nga nagasiling, gina-angkon ko
ikaw para kay Kristo. Gina-angkon, kon
sayuron si Kristo na ang nagapanag-iya sa imo.
Kon
may tagumatayon sa aton panimalay ginasingganan kita sang simbahan nga magtipon
sa pagsindi sang candela kag sa pagpangamuyo sing tingob. Pananglitan mabugtu-an na sing ginhawa, isa-isa
nagakadto kita sa minatay kag sa liwat, sa katapusan, ginapat-inan naton sang
krus ang iya agtang. Ginapadumdum naton
sia kag ang tanan nga nagapalibot sa iya, malaut man ukon maayo, nga indi ninyo
matandog ang iya kalag kay ini ginapanag-iyahan na ni Kristo.
Isa
sa mga natandaan ko pa gid nga mga hilimuon sa pagpreparar sang pagkaon amo nga
antes magsukad ginamarkahan anay sang krus ang kan-on. Wala naton dayon ginahakad ang kan-on, sa
baylo ginasuli naton ang luwag kag ginakurit ang krus sa kan-on. Ginamarkahan ini sang Krus - ang kan-on kag
ang dulot sini nga sustansiya kag kusog ginamarkahan sang laragway nga
nagasimbolo kay Kristo.
Ano
ang kahulugan sini nga mga pagmarka sang krus?
Ini nagakahulugan nga halin sa ginsugoran tubtob sa katapusan sang aton
kabuhi, lakip ang pinaka-importante nga sustento sang aton kabuhi, nga
nagahatag sa aton sang kusog sa pagbuhat sang aton matag-adlaw nga obligasyon, ini
tanan ginamarkahan sa laragway kag imahen sang krus. Gani ini iya na ni Kristo, iya na sang
Dios. Ini nga marka, ang laragway nga
ginkurit sa iya magapakilala nga iya sia, iya ini ni Kristo.
Si
Jesus nagpamangkot sa mga luyag magdakupdakup sa iya “kay sino bala laragway
kag ngalan ang yara sa kwarta?” kag
nagsabat sila, iya sang emperador. Kag
gani si Jesus nagsiling, gani ihatag sa emperador ang iya sang emperador.
Kay
sino imahen kag laragway ang yara sa imo? ang imahen kag laragway ni Kristo. Gani ihatag sa Dios ang iya sang Dios.
Ang aton ebanghelyo wala
nagatunga sang aton katutom, wala niya ginatunga ang aton pagkatampad – nga
lain ang aton pagkatampad sa emperador ukon sa aton banwa kag pungsod kag lain
man ang aton pagkatampad sa Dios. Ngaa.
Kay imposible. Dumduma nga si Jesus nagsiling “Wala
sing tawo nga makaalagad sa duha ka agalon. Indi kamo makaalagad sing dungan sa
Dios kag sa manggad.” Kon sayuron pa kon
may duha ukon madamo nga mga agalon may ara gid nga isa nga dapat
mangibabaw. Kon may duha ukon madamo nga
mga sulondon may ara gid nga isa nga mas mataas kag nagadumala. Ang pamangkot,
sa imo kabuhi sin-o ukon ano ang nagapangibabaw? Ano ang mas mataas? Sin-o ang nagadumala?
Sa liwat ang aton ebanghelyo wala nagatunga sang aton
loyalties. Ginmarkahan na kita nga iya
sang Dios, gani ang katutom naton katutom sa Dios gid lang. Kag kon nangin maayo kita sa aton
panghimanwa, kon nangin masinulondon kita sa mga layi sang aton pungsod ina
tungod kay nangin matutom kita sa Dios.
Ang katutom sa banwa bahin sang aton katutom sa Dios.
Indi mo mabulag ang imo citizenship sa duta sa imo citizenship sa
langit. Makita naton sa aton nahauna nga
balasahon nga gin-usar sang Dios ang pagano nga hari nga si Ciro agod ang banwa
nga Israel maluwas kag mapabalik sa ila duta.
Gin-usar sang Dios ang hari, gin-usar niya ang opisyal sang banwa agod
ang iya katawohan makapanumbalik sa Iya kag magatuman ang iya kabubut-on. Tandaan naton ina mga opisyales sang aton
banwa nga yari diri – tuguti nga ang Dios mag-usar sa imo nga iya instrumento
agod mapanumbalik sa Dios ang iya katawohan.
Kay indi mo mahamulag ang imo obligasyon sa banwa sa imo obligasyon sa
Dios kay ang pagbuhat mo sing nagakaigo sang
imo obligasyon sa banwa bahin sang imo obligasyon sa Dios. Bahin ina sang imo obligasyon sa Dios.
Agod mabuligan kita sa
pagkabuhi sini may duha kita nga mga basehan nga mga prinsipyo. Sa sining duha ka prinsipyo nagahalin ang
aton pagpati kag katutom sa Dios.
Una – kabigon naton ang aton ginhalinan. Kita mga anak sang Dios nga naghigugma sa
aton.
Bisan ano pa ang aton himuon, bisan ano pa ang aton ihambal, bisan
diin pa kita makadto, bisan ano pa ang matabo sa aton, tandaan naton nga kita
pinalangga nga mga anak sa Dios. Ina nga
pagkilala sang kaugalingon magaporma sang aton pamatasan. Amo ini ang magatulod sa aton, ang magabulig
sa aton sa pagkabuhi sing matarong.
Bisan diin ikaw dalha inang imo identity. Sa iskwelahan man ukon sa opisina, sa uma man
ukon sa balay, naga-isahanon ka ukon
upod sa madamo, may nakakita ukon wala, may nakakilala ukon wala, kon
klaro sa imo kon sin-o ka, nga ikaw anak sang Dios, magakabuhi ikaw santu sa
sina nga pagkilala. Ang anak sang Dios
wala sing ikasarang nga mangawat; ang anak sang Dios indi makabatas magdaya;
ang anak sang Dios tampad sa iya pamilya, ang anak sang Dios kahibalo
magsakripisyo, ang anak sang Dios handa nga magbulig sa iya isigka-pareho. Amo ini ang una nga basehan sang aton
pagkatampad sa Dios – ang aton identity, ang aton pagkilala kon sin-o ako,
sin-o ikaw – ako anak sang Dios.
Ikaduha nga prinsipyo, ginkabig naton ang aton ginhalinan, kabigon
naton karon ang aton padulungan, ang aton katapusan. Kag ano ini ang aton katapusan akg
padulungan? Nga kita makapakig-upod sa Dios sa walay katapusan. Amo ini ang rason kon ngaa kita gintuga, kag
kon ngaa kita gintubos ni Kristo – agod nga kita makapakig-upod sa Dios sa
walay katapusan. Gani sa tagsa naton ka
buluhaton hunahuna-on naton pirme, “ini bala makapahilapit sa akon sa Dios,
ukon ini bala makapahilayo sa akon sa iya.”
Ma-usar ko bala ang akon puesto agod mapahilapit ako kag ang akon
pamilya sa Dios ukon ini bala nga puesto nagapahilayo sa akon sa Dios kag sa
akon panimalay? Ang paggamit ko bala
sang akon kwarta nagapalapit sa akon sa Dios ukon nagapalayo sa akon sa iya? Ang akon bala presensya sa sini nga meeting
magapalapit sa akon kag sa akon mga kaupod sa Dios ukon mangin sablag ako sa
tunga nila kag sa Dios? May isa anay ka
tawo nga ginmarkahan niya ang iya kwarta sang gamay lang nga krus. Siling niya, epektibo bala. Kada tulok ko sa kwarta ko nga ibayad
nagapamangkot ako ining akon ginabakal makapahilapit sa akon sa Dios ukon
makapalayo.
Sa aton pagselebrar sang ika___ nga pagsukat sang aton parokya,
himuon naton ining duha ka principle nga talaksan bilang isa ka katilingban, kon
bala ang aton presensya sa parokya nagpatubo sa aton sang consciousness sang
aton ginhalinan – ang aton ginhalinan nga kita pinalanga nga mga anak sang
Dios. Husisaon man naton kon bala ang
aton presensya sa parokya nagpatubo sa aton sang consciousness sa aton padulungan,
nga ang tanan nga yara sa aton dapat amgdala sa aton palapit sa Dios.
Kita tanan ginmarkahan na sang simbolo ni Kristo nga amo ang
krus. Iya na kita ni Kristo, gani
ginahatag naton sa Dios ang iya sang Dios.
No comments:
Post a Comment