ang gugma tulumanon - piesta sa layog, maasin 2015

May na-istorya ako anay nga nagasugba sing mais didto sa calle real.  Wala sia nakakilala nga pari ako.  Namangkot ako, Manang nakasimba ka na?  Nagsabat sia, sige kuyab sang mais, makapangadi man ako diri, ngaa masimba gid ako?  May punto sia, indi bala?

May isa man ako nga nakilala nga namangkot kon bala puede lang nga makasimba sa telebisyon ukon sa radyo?  Magluwas nga indi ka na maghalin sa imo balay makapangadi pa ikaw sing mas matawhay, makapamati nga wala sing disturbo, kag indi ka na maggasto plete ukon gasolina.  May ginamisahan gani ako anay sa squatters area didto sa ciudad.   Ang chapel nahamtang sa tunga sang mga naga-ilikit-ikit lang nga mga balay.  Gani ang iban sa ila kon magmisa, nagapabilin lang sa ila balay kag mamintana, nagasuksuk lang sa gihapon sang ila duster kag magsimba.  Isa lang ang desbentaha sini nga situwasyon – indi ka makakalawat. 

Pero sa subong nga panahon amat-amat na nagamoda ang delivery service.  Ang pagkaon sarang na lang madeliver sa imo balay – tawag ka lang.  Ang bulong sarang na lang karon mapa-deliver.  Indi na kinahanglan nga magguwa pa ako sa balay kag magkadto sa botika.  Ang shopping karon nga panahon amat-amat man nga delivery na lang – order ka sa computer, pili ka sang imo luyag, idul-ong nila sa imo balay kag kon mabaton na nimo, bayaran mo. 

Maga-abot man bala ang tion nga masimba na lang kamo sa inyo balay kag ipadeliver lang namon ang kalawat?  Siempre kon ma-deliver na ang kalawat ipadala man ninyo balik ang inyo kolekta.  Gusto nyo na?  Puede ayhan nga kon magkonpesar kita pila ka adlaw i-text lang naton ang aton sala kay padre tapos ipadala man niya ang iya bendisyon sa text man?  Gusto nyo na?  Sa pagkamatuod kon tugut lang ini, kami nga mga pari ang una gid nga malipay.  Samtang nagalakat-lakat ako sige man akon pakompesar – total itext mo man lang.  Tapos indi man kinahanglan nga makadto pa ako diri.  Puede man nga mamisa ako sa seminaryo kag iradyo ko lang diri sa parokya.

Pero indi ini tanan tugut. Nami tani, pero indi ini tugut.  Ngaa – bangud sang duha ka labing daku nga sugo – ang paghigugma sa Dios kag ang paghigugma sa isigkatawo.

Ano ang koneksyon sini?

Ang aton pagtuo kag gani ang tanan naton nga ginahimo angot sa aton pagtuluohan is a relationship.  Ang aton pagtuo kay Kristo nagatuga sa aton sang kaangtanan sa Dios kag sa aton isigkatawo.  Ang sakramento sang bunyag naghimo sa aton nga mga anak sang Dios kag nagpasulod sa aton sa katilingban sang mga mag-ululutod.  Ginpa-in kita, gintingob kag gintukod 41 years ago bilang isa ka parokya, isa ka katilingban kag bangud sini ang tagsa-tagsa sa aton bahin sini nga katilingban kag may kaangtanan kag kahilabtanan sa isa kag isa. 

Ini mga istruktura, ining aton parokya, istruktura nga makabulig sa aton agod matuman kag mapatabo ining duha ka labing daku nga sugo sang kasugoan – ang paghigugma sa Dios kag ang paghigugma sa isigkatawo.  Ang parokya, ang paroko nga amo ang pangulo sining parokya, ang iya mga kabulig kag katuwang sa parokya, ang mga ministro nga naghalad sang ila tinion sa pag-alagad sa liturhiya, ang parish pastoral council, ang mga BAC, ang PAC, ang aton MKK – these are structures that make us actualize the greatest commandment – love God and neighbour.

Bisan ang paghiwat sang mga sakramento, ang pagtipon kada Domingo sa pagsimba, ang ini nga simbahan, ang pagpaobra sini nga simbahan, ang presensya ninyo nga mga sumilimba - these are structures in the parish that make us actualize the greatest commandment – love God and neighbour.

Sorry indi puede ang delivery.  Sorry indi puede nga mag-simba sa TV ukon sa radyo.  Sorry indi puede ma-text ang imo konpesyon.  Ang nagamasakit lang ang puede makasimba sa tv ukon sa radyo.  Pero nanotisyahan ninyo nga ang pangamuyo naton sa masakit amo nga ayuhon sila sa madali nga panahon.  Para sa ano?  Agod mapabalik sila liwat diri sa aton katilingban kag makasimba liwat upod sa aton – that he may be restored back to the community.  Bangud kay ang katilingbans ang aton parokya kag ang mga aktibidades naton sa parokya mga pamaagi agod mangin mahapos sa aton ang magtuman sang duha ka labing daku nga sugo nga amo ang paghigugma sa Dios kag sa aton isigkatawo.  Mas makatuon kita maghigugma kon kita naangot sa aton parokya.

Paano ini?  Hatagan ko kamo sang duha ka konkreto nga panghunahuna.

Una, sa parokya sa aton katilingban makatuon kita nga ang paghigugma indi balatyagon kundi tulumanon - love is not a feeling, but a commandment –ginsugo kita nga maghigugma, ginhatag ini sa aton bilang tulumanon.  Sa katilingban sang parokya amo ini ang una nga tulon-an - nga indi ini balatyagon - nga sa subong nga adlaw daw namuhaw-muhaw ako sa paghigugma, luyag ko hakson ang tanan, luyag ko buligan ang tanan.  Pero sa dason nga adlaw wala na ako gana, nabudlayan na ako. 

Tun-i higugmaon ang tagsa-tagsa bisan pa mabudlay himuon.  Kon si Fr. Digoy naghulat lang sang feelings of love, pamatyag ko matapos lang ang iya term diri, indi pa ina mag-abot.  Pero kon ang paghigugma isa ka tulumanon, bisan diin man sia i-assign nga parokya, bisan sa ano man nga kahimtangan, bisan natak-an na sia, iya ini tun-an nga batunon kag hakson. 

Amo man ina sa aton.  Indi man tanan nga lector masaw-an mo, indi man sa tanan nga oras nanami-an ka sang imo kilid, indi man tanan nga Eucharistic Minister maluyagan mo, indi man sa tanan nga tion nga luyag mo magpakalawat sa masakit.  Indi man tanan nga ginahimo ni Fr. Digoy mabaton ko.  Pero akon ini parokya, akon ini katilingban, akon ini panimalay, gani hakson ko ini, tun-an ko ini higugmaon.  Diri sa katilingban sang aton parokya ginakabuhi naton ang paghigugma bilang isa ka commitment, kag ang gugma indi balatyagon kundi tulumanon.

Tulukon naton ang halimbawa ni San Martin.  Ang paghigugma ni San Martin paghigugma nga wala lang nasandig sa balatyagon kundi paghigugma nga ginbaton bilang tulumanon.  Nagkabuhi sia sa katilingban sang mga relihiyoso nga nagyaguta kag nagpakanubo sa iya bangud pinamataan lang sia.  Sa sini nga katilingban nagtuon sia nga maghigugma nga may pagpaubos, gin-alagaran niya bisan pa ang mga nag-insulto sa iya.  Kahapos magsiling nga nagahigugma ka kon bilog nga adlaw yara ka man lang sa sulod sang imo kwarto ukon sa tunga sang imo mga admirers.  Apang makatuon ka lamang sang matuod nga paghigugma kon ikaw nagapakig-sakop kag nagapakig-angot sa mga katapo sang katilingban sang aton parokya.

Ikaduha, mangin mahapos ang pagtuman sang duha ka labing daku nga sugo sang Dios dira sa parokya kay paagi sa parokya ang aton paghigugma mangin organized. 

Ang paghigugma agod nga ini makadala sing pagbag-o sa katilingban dapat mangin organized love.  Kon sayuron indi lang ini obra sang isa ka tawo.  Ang paghigugma indi lang magpabilin nga masig-masig nga pagpaninguha sang tagsa-tagsa.  Sa baylo gina-ugyunan ini sang bug-os nga katilingban.  Indi lang ini waslik diri, waslik didto; panagtag diri panagtag didto; bulig diri, bulig didto.  Sa baylo ini nga paghigugma ginaplano, may padulungan, may ginapaabot kag gina-ugyunan sang tanan. 

Paano naton sia mahigugma kag mabuligan agod makabangon sia kag makatindog sa iya kaugalingon.  Paano naton mapasanyog ang kabuhi sang mga mangunguma.  Paano naton mabuligan ilabi na gid ang wala naga-iskwela nga mga pamatan-on.  Paano kita makasabat sa kinahanglanon sang mga tigulang sa aton parokya.  Ginatingob naton ang aton ikasarang, ginatipon naton ang aton talento, ginahugpong naton ang aton mga pagpaninguha nga makabulig – amo ini ang gugma nga gin-organize kag matabo lamang ini kon kita nagakabuhi nga parokya, kon kita katilingban.

Paagi sa pagpanguna ni San Martin ang katilingban sang mga Dominicanos sang Lima Peru nagtukod sang orphanage para sa mga kabataan nga gin-abandonar sang ila ginikanan.  Si San Martin man ang nagalibot sa pagtipon sang mga donasyon agod ang iya katilingban makapadayon sa ila pag-alagad sa mga nagakinahanglan.  Sa katapusan indi lang si San Martin ang naghigugma kag nag nangin maalwan.  Kundi paagi sa iya ang katilingban nag nangin aktibo man sa ila pagbulig, nagnangin maalwan, kag nagtuon nga maghigugma bilang katilingban.

Mabudlayan si San Martin magtubo sa paghigugma kon wala ang iya katilingban.  Kag nangin mahapos man sa katilingban nga magtuon nga maghigugma bangud sang pagpangulo kag pagtingob sa ila ni San Martin.  Higugmaa ninyo ang inyo parokya, value your parish kay amo ini ang aton iskwelahan nga magapatuon sa aton sa paghigugma sa pagtuman sang duha ka labing daku nga sugo sang kasugoan – higugmaa ang Ginoo nga imo Dios sa bug-os mo nga tagipusuon kag higugmaa ang imo isigkatawo subong sang imo kaugalingon.