23rd Sun C

May isa anay ka reporter sa radyo.  Nakakita sia nga may nabunggu-an sang salakyan.  Luyag niya kontani makakuha sang report, pero kadamo na sang mga usisero nga nagapalibot sa nabunggu-an, indi na siya makapanigal-ot.  Gani nagsinggit siya, “Pa-agya n’yo ako, tatay ko na ang nabunggu-an.” Ginpasal-ot sia sang mga tawo. Kag sang pag-abot niya sa lugar nga ginahamtangan sang na-aksidente, isa gali ka kabayo ang nabungu-an.  Siling sang tawo sa kilid “um ara tatay mo.

Sa kalibutan may ginatawag kita nga mga huro-huro, ang mga nagapatuga-tuga, gulpi lang ma-intra nga wala nagabinag-binag kon ano ang iya ginasudlan, kag  kon ano ang iya madangatan.  Waay na sia nagapanumdum pa.  Kita ya gani guwapa ukon guwapo, mamana na lang sia sa gilayon.  Waay pa sia gani nakabinag-binag kon bala makasarang sia sang responsabilidad.  Amo ini ang mga tawo nga nagapadala-dala lamang sa emosyon – tudo-tudo ang akig waay pa gani naintiendihan kon ano ang natabo.  Amo ini sia ang gusto hap-an ang tanan - “ay ma-charismatic ako, ay ma-cursilista ako, ay ma-legion ako, ay ma-lector ako” - tanan tanan luyag hap-an.  Pagkatapos bayaan man lang kay indi na makasarang.  Siling ni Jesus:  Hmm, matapos niya mapasad ang sadsaran indi na sia makasarang magpadayon sini.

May ara man ya nga maayo gid sia sa panugod, desidido gid.  Apang sang ulihi tungod kay kadamo sang kabudlayan, indi na sia makapadayon.  May ara man ya nga ginapili ya lang ang mahulohapos. 

May mga tawo nga masyado ka maalwan sa iya isigkatawo ukon sa simbahan, pero mabudlay sa iya ang magpatawad.  May ara man ya nga palangga gid niya ang pari, pero kaluluoy ang ila kabulig.  May ara man iya nga masyado magpangadi, pero grabe man mang-libak.  May ara man iya nga debotado gid kaayo, pero nagapangdaya man sa negosyo.  Ang rason “ti padre negosyo ni ‘ya.”

May ara man iya nga masunod sa Ginoo, apang kon may mga problema na kag daw indi na maayo ang tanan, nagasunggod kag naga-untat sa pagsirbi sa iya - mga fair weather Christians.   Siling ni Jesus:  “Hmm, nagapatindog kamo sang tore nga indi man lang ninyo matapos, kag nagasugod kamo sang giyera nga daw waay man kamo gana nga dag-on.”

Ano karon ang aton buhaton?  Duha ka mga butang.

Una, himo ka sing tag-isa lang ka tikang.  Indi magpadaso-daso kag indi magdali.  Kon kaisa nagatalang kita kag kon indi gid man ta magtalang, nagakataka kita tungod kay luyag naton mahuman sa gilayon. Kon kaisa tungod kay nagadali kita indi na kita makapanumdum sing maayo kag nagaka-lumos kita sa aton mga problema.  Amo ini kon kaisa, ginapanumdum na naton ang tanan nga problema nga matabo, bisan malayo pa ini.  Ano pa nagatingob kag nagaka-lumos kita sa problema nga waay pa natabo.  Apang kon isa-isahon mo lamang ang pag-atubang sang mga problema kon ini mag-abot, indi gid man ini masyado kabudlay. Gani tag-isa lang bala ka tikang kay isa man lang ka tinuga ang makahimo sing mas sobra sang sa isa ka tikang - ang talimbabaga. 

Amo man ini sa espirituhanon nga kabuhi sa aton pagsunod kay Kristo.  Don’t say I will be a saint before next Sunday. Indi ka magsiling nga mangin maayo na gid ikaw sa isa lamang ka bulan, ukon sa isa ka tuig, kay indi naton mahimo ina.  God is not expecting us to change our attitudinal problems, our bad habits in just one day.  Sometimes it will take a life time process.  Ang Dios waay man nagapaabot nga mabaylohan naton ang tanan naton nga malain nga pagginawi sa isa lamang ka adlaw.  Kon kasia ini nga pagpaninguha matapos lamang kon patay na kita.  Ang importante nga padayon kita nga nagatinguha nga magtubo – bisan hinay lang pero sigurado.  Ang tawo nga nagadali kag mataas ang ambisyon, daku man ang iya lagapak kon mahulog.

Ikaduha. Magtuon nga magsakripisyo. Daw sa nahadlok kita sa sini nga tinaga gani tawgon lang naton ini nga delayed gratification. 

Ano ining delayed gratification?  Nadumduman ko anay gintudlu-an kami ni lola kon paano magkaon sang isda agud masipot gid namon.  Siling niya, unahon mo ang nalaw-ayan mo nga bahin sang isda.  Una ang ikog, tapos siksikon mo ang ulo, tapos ang bahin sa iya tian.  Sa pinaka-ulihi, kan-on mo ang pinakanamit nga bahin.  Sa sina nga paagi ma-sipot mo gid ang isda.  Ipa-ulihi ang manamit nga bahin, unaha ang mabug-at, unaha ang mabudlay, agud nga may luyag pa nga mabilin sa imo sa pagpadayon tubtob sa ulihi, tungod kay didto ang pinakamaayo – gina-delay lamang nimo ang maayo.

Amo man ini sa aton kabuhi. Unaha ang mas importante kag ang mas mabudlay.  Unaha ang tuon ugaling mag-bayle; unaha ang panimalay kag ipa-ulihi lang ang barkada, unaha ang trabaho sang sa madjong.

Amo man ini sa kabuhi kinahanglan kahibalo kita magsakripisyo.  Kahibalo kita magpaiway anay sang mga maayo kag mag-una sang mga mabug-at agod to nga makapadayon ktia sa aton mga hilikuton kag mangin madinalag-on kita sa katapusan.  We have to learn to discern, we have to learn to take one step at a time, we have to learn to postpone gratification otherwise we will leave so many unfinished business in life, otherwise we will not persevere till the end.