21st Sun C

Subong pamalandongan naton ang isa ka butang nga indi ninyo luyag mabati-an. Siguro masiling kamo nga daw nalipasan ako sang panahon nga daw wala na man ini gina-istoryahan. Ang iban gani waay na nagapati sini. Subong magahambal ako nahanungod sa impierno – i-m-p-i-e-r-n-o. Gin-spell ko ini kay basi nalimtan na naton nga may impierno kag basi magdumdom kita nga ang simbahan waay na nagatudlo sini. Siguro ang iban sa inyo natak-an mamati sini ukon indi kamo luyag magpamati sini. Pero, ti ano gid kon indi kamo mamati. Kon sa ingles pa, what the hell!

Ano ang impierno? May iban nga nagasiling nga ang impierno isa ka duog sang kalayo sa diin ang mga bihag ni Satanas ginpa-antus kag ginapintasan sang madamo nga mga kasakitan. May iban man nga nagasiling nga ang impierno madulom nga duog nga puno sang mga ulod kag pag-ugayong sa kasakit. May iban man nga nagasiling nga ang pagpuyo upod sa ila ugangan daw impyerno!

Amo ini ang ginasiling sang iban nahanungod sa impierno. Karon magapamati kita kay Jesus kon ano para sa iya ang impierno. Madamo ang description ni Jesus nahanungod sa impierno pero karon nga adlaw sa aton ebanghelyo gindescribe ni Jesus ang impierno nga isa ka sirado nga pwerta. Hell is a closed door. Kag indi lamang serado nga pwerta, labaw diri, ini nga pwerta magapabilin nga serado tubtob sa katubtoban. Indi na ini ma-abrihan pa liwat. Waay na sing tsansa nga maabrihan pa ini. Kon magsira ini, serado na ini sa katubtoban. Amo ini para kay Jesus ang impierno kag amo ini ang iya ginasaysay sa aton ebanghelyo nga gintiguluhan “ang paalangiran sang serado nga pwertahan.” Ngaa serado nga pwerta, ngaa nga ang impierno gintawag ni Jesus nga serado nga pwerta?

Kon may nagsira sang pwertahan sa imo guya ini nagakahulugan nga wala ka sing bahin sa iya kabuhi. Ginapagwa ka niya sa iya kabuhi. Gina-kick-out ka niya sa iya kabuhi. Waay ka na sing labot sa iya kabuhi - itsa fuera – sa malip-ot nga pulong indi ka na bahin, indi ka na sakop sang amon katilingban.

Ngaa daku gid nga butang kon kita ma-itsa fuera kag waay na kita bahin kag labot sa isa ka katilingban? Ngaa ginatawag naton ini nga kabuhi, impierno.

May isa anay ka istorya. Sang 1960s may isa ka babayi ngalan niya si Pearl. Mga 70 anyo na ang iya idad. Nagpakigbahin sia sa isa ka demonstration batok sa racism sa diin gina-descriminate ang mga mga negro sa mga puti. Tungod sadto nga demonstration ginpriso si Pearl. Samtang sa prisohan sia gin-heart attack sia, pero bisan amo na to ang iya situwasyon, indi sia magsulod sa ospital tungod kay ang ospital sa diin sia gindala waay nagabaton sang mga negro. Kag bilang protesta, bisan puti sia, waay sia nagsulod.

Mga pulo ka tuig ang nagligad, nakita naman ining tigulang nga babayi nga nagapasakup sa demonstrasyon batok sa mga nuclear nga mga hinganiban. Isa ka bes pinamangkot sia sang isa ka pari, “Pearl ano ang kalipay para sa imo – ano gid bala ang kalipay para sa imo? Si Pearl nagsabat – “ang kalipay amo nga ako napasakup – ang kalipay amo nga ako nagpakigbahin.”

Ang kalipay amo nga ako nagpakigbahin kag napasakup - to belong. Diri mo mahangpan kon ngaa ang mga pamatan-on maka-risgo nga mapatay sa hazing sang mga fraternity agod nga sila mapasakup sa sina nga grupo. Waay ako nagasiling nga ma-intra kita sa sini nga mga grupo. Apang indi mo gid mapunggan ang tawo sa iya huyog, sa iya luyag nga sia mapasakup ukon magmangin-bahin. Man by his very nature is a social being.

Kon indi na nila makita sa ila panimalay nga sila napasakup, kon indi na nila makita sa ila simbahan nga sila napasakup, gina-abiabi, ginapalangga, kag gina-atipan, mangita gid na sila sang iban. Ngaa? tungod kay ang kalipay amo nga kita napasakup, kita nangin bahin, that we belong.

Diri naton mahangpan kon ano ang impierno – kicked out, itsa fuera, pinagwa, waay sinapak, ginseradhan sa walay katubtoban. Ang langit amo nga kita nangin bahin upod sa aton mga kahagugma, kag ang impierno amo nga kita gintapok kag wala ginbaton kag ginseparar sa walay katubtuban sa aton mga kahagugma.

Isa na lang ka pagpa-andam.

Kon ikaw nagapakig-ugyon sa mga buluhaton sang aton katilingban, sang barangay, sang aton eskwelahan, sang aton simbahan naga-praktis na ikaw magpa-langit. Naga-ugyon kita, nagapasakup kita, nagapakigbahin ikaw. Ang aton mga urna sa aton barangay, ang pagpakigbahin sa aton mga hilikuton sang aton parokya, ang pagbuligay naton santu sa halimbawa sang aton mahal nga patron isa ka pagpasakup, isa ka pagpakigbahin.

Apang kon nagapalain-lain ikaw, kag waay ka nagapasilabot, waay ka naga-intra, waay ka nagapakigbuylog, waay ka nagapanapak, yara ka lang dira nagap[akuribong sa imo balay nga napalibutan sang mataas nga pader, kag wala ka sing paki sa nagakalatabo sa imo palibot kag sa aton parokya, ti mayo gid na kay naga-praktis ka na nga daan para sa imo impierno. Gani, good luck na lang sa imo. Bahala ka da. Kon sa iningles pa, what the hell.