23rd Sun C

May isa anay ka reporter sa radyo.  Nakakita sia nga may nabunggu-an sang salakyan.  Luyag niya kontani makakuha sang report, pero kadamo na sang mga usisero nga nagapalibot sa nabunggu-an, indi na siya makapanigal-ot.  Gani nagsinggit siya, “Pa-agya n’yo ako, tatay ko na ang nabunggu-an.” Ginpasal-ot sia sang mga tawo. Kag sang pag-abot niya sa lugar nga ginahamtangan sang na-aksidente, isa gali ka kabayo ang nabungu-an.  Siling sang tawo sa kilid “um ara tatay mo.

Sa kalibutan may ginatawag kita nga mga huro-huro, ang mga nagapatuga-tuga, gulpi lang ma-intra nga wala nagabinag-binag kon ano ang iya ginasudlan, kag  kon ano ang iya madangatan.  Waay na sia nagapanumdum pa.  Kita ya gani guwapa ukon guwapo, mamana na lang sia sa gilayon.  Waay pa sia gani nakabinag-binag kon bala makasarang sia sang responsabilidad.  Amo ini ang mga tawo nga nagapadala-dala lamang sa emosyon – tudo-tudo ang akig waay pa gani naintiendihan kon ano ang natabo.  Amo ini sia ang gusto hap-an ang tanan - “ay ma-charismatic ako, ay ma-cursilista ako, ay ma-legion ako, ay ma-lector ako” - tanan tanan luyag hap-an.  Pagkatapos bayaan man lang kay indi na makasarang.  Siling ni Jesus:  Hmm, matapos niya mapasad ang sadsaran indi na sia makasarang magpadayon sini.

22nd Sun C

Kon ang pagpaubos amo ang ugat sang tanan nga mga birtud, ang bugal amo ang ugat sang tanan nga kalautan.  Kag agud matapna naton ining bugal kag mabaylohan sang pagpaubos, si Kristo sa aton ebanghelyo nagpakilala sa aton sang duha ka sahi sang bugal. Sa aton kabuhi bilang Kristiano, kinahanglan mabal-an mo ang imo pangontra agud malutos mo ini. Gani, ang pamangkot amo, ano ini nga mga bugal?  Ano ining duha ka sahi sang bugal? Kon nakapamati kamo sing maayo sa pagbasa ko sang ebanghelyo ginsugdan ini ni Lukas sa pagsiling nga ang ginasaysay ni Jesus isa ka palaangiran.  Ano ang paalangiran?  Ang paalangiran isa ka istorya nga may tuyo nga masaway sang mga tagpalamati paagi sa pagpakita sa ila sang ila pagginawi agud makoreheran ini.  Ini isa ka istorya sa diin makita sang tagpalamati ang ila kaugalingon kag ang ila pamatasan sa sini nga istorya, agud makambyohan nila ang ila waay nagakabagay nga pamatasan.Waay diri ni Jesus ginadayaw ang isa kag ginapakalain ang isa.  Sa sini nga palaangiran gina-criticize ni Jesus indi lamang ang isa kundi ang duha ka sahi sang tawo, kag ang ila pamatasan nga puno sang bugal.  Sin-o ini sila:

21st Sun C

Subong pamalandongan naton ang isa ka butang nga indi ninyo luyag mabati-an. Siguro masiling kamo nga daw nalipasan ako sang panahon nga daw wala na man ini gina-istoryahan. Ang iban gani waay na nagapati sini. Subong magahambal ako nahanungod sa impierno – i-m-p-i-e-r-n-o. Gin-spell ko ini kay basi nalimtan na naton nga may impierno kag basi magdumdom kita nga ang simbahan waay na nagatudlo sini. Siguro ang iban sa inyo natak-an mamati sini ukon indi kamo luyag magpamati sini. Pero, ti ano gid kon indi kamo mamati. Kon sa ingles pa, what the hell!

Ano ang impierno? May iban nga nagasiling nga ang impierno isa ka duog sang kalayo sa diin ang mga bihag ni Satanas ginpa-antus kag ginapintasan sang madamo nga mga kasakitan. May iban man nga nagasiling nga ang impierno madulom nga duog nga puno sang mga ulod kag pag-ugayong sa kasakit. May iban man nga nagasiling nga ang pagpuyo upod sa ila ugangan daw impyerno!