5th sun A - 2

Nga gincomparar sang Ginuo ang iya mga sumulunod nga mga asin?  Ngaa ginhangkat kita nga mangin asin?  Ang asin tam-an ka importante para sa tawo halin pa sang tiempo ni Jesus. Sa pagkamatuod sang una sa baylo sang kwarta nga ginausar naton subong, ang asin amo ang means of exchange sang mga tawo.  Amo ini ang ginasweldo sa mga soldado kag mga trabahador, kag ginabaylo ini sa mga matag-adlaw nga kinahanglanon katulad abi sang pagkaon kag bayu.  Gani bisan subong sa iban nga mga pungsod nga nahamtang malayo sa dagat, may ara pa sila sa gihapon sang salt caravan nga nagadala sang isa sa mga importante nga kinahanglanon sang tawo.  Importante ka ayo ang asin. Tungod sini may mga pagpati kita nga kon ma-uyang mo ang asin may kadimalasan nga matabo.  Kag bisan sa aton relihiyon ginausar ini sa agua bendita - ang tubig ginawisikan sang asin kay halin pa sang una may pagpati nga ini nagapahilayu sang yawa kag sang iya gahum.

Ngaa mamangkot kita, ano ang kalidad nga yara sa asin sa bagay nga importante ini sa tawo kag gin-usar ini sang Ginuo nga mangin kaangid sang iya mga sumulunod?  Ngaa ginahangkat kita nga mangin asin?  Duha ka butang.

Una ang asin nagahatag sing sabor sa pagka-on.  Kon waay sing asin waay gid pulos ang pagka-on bisan pa ang nagluto sini isa ka maayo nga cook.  Kasubong man ini ang aton kabuhi bilang mga sumulunod ni Kristo - kita dapat maghatag sing sabor sa kalibutan.  Paano ini? 

Sa seminario sang una may mga party-party man kami nga ginahiwat, kag siyenpre kami man sina ang nagapreparar.  Kon kaisa tungod kay kadamo sang preparahon, mag-abot na gani ang party, daw natamaran ka na kay kapoy ka na, husto mo na lang itango-tango sa lamisa.  Apang may ara gid na kami nga ginapili nga mangin MC sang programa nga maayo gid magpadalagan sang tanan, nga bisan nakapoy ka na, ginapasadya niya ang programa kag daw ginapukaw ka sa imo kakapoy.  Amo ini siya ang ginatawag namon nga life of the party.

Kasubong man ini sa kabuhi sang isa ka kristiano - siya asin tungod kay ginahatagan niya sabor ang pagka-on - ginapukaw niya ang taste buds sang aton dila, ginapukaw niya kita sa aton kataka, sa aton katamad, sa aton kakapoy - siya ang life of the the party.  May pari kami sang una sa seminario, nga kabuot gid sa iya, sa bagay nga sa iya presensiya daw indi ka gid maghimo sang sala, indi ka gid makabutig, naga-pisan ka sa imo trabajo, kag bisan mabug-at ini daw nasadyahan ka sa pagbuhat sini.  Siya makatulad naton sa asin - ang iya presensiya nagatulod sa imo sa pagbuhat sing maayo, nagakadula ang kahadlok, ang imo kakapoy kag ang imo kataka. Amo ini ang namin ko nga ang kristiyano asin, ang life of the party - ang aton presensiya nagatulod sa iban sa pagbuhat sing maayo kag nagahatag sing kahigayunan sa iban nga maghimo kag magbatyag sing maayo. 

Subong mamangkot kita, kasubong man bala ako sini sa akon kabataan, sa opisina, sa iskwelahan, sa jeep.  Ang akon bala presensiya nagadala sa iban sing kalipay, sang encouragement, sang kamag-an sang balatyagon?  Ang akon bala presensiya nagatulod sa iban sa pagbuhat sing kaayuhan?  This is what it means to give flavor to the world - to become salt.

Ikaduha, ang asin waay lamang nagahatag sing sabor.  Subong man, ini nagapreserve sang pagkaon agud indi ini magbaho, masamad kag ma-uyang.  Paano kita karon nga mga sumulod ni Kristo magmangin asin nga naga-preserve sang kalibutan agud indi ini magcorrupt?  Paano naton mapreserve ang aton katilingban agud indi ini masamad?

May isa anay ka health worker sang gobierno nga nagaobra sa isa ka barangay sa probinsiya sang Iloilo. Nagsiling siya:  “Fr. matuod nga ang Iloilo number one sa pagpalapnag sang contraception sa bilog nga pungsod, pero waay ko ina ginasunod.  Batok ina sa akon consciencia.  Sa baylo ginatudlu-an ko sila magcalendar method.  Ako lang ang waay nagapangayo sa centro sang mga pills kay ginapromote ko ang calendar method sa amon barangay.”

Kita tanan nahamtang sa katilingban nga puno sang pagdaya, palapaway kag may pamatasan nga kon mahimo pa lang lutsan ang layi, lutson gid naton.  Sa isa ka squatters area diri sa ciudad ang isa ka grupo nga nagatipon sa faith sharing naghilisugot nga indi na sila magbutang sang jumper sa ila koryente agud nga bisan sa gamay nga butang mangin honest sila sa ila kaugalingon kag mapatuman ang isa sa simple nga buhat sang honesty.  May ara man iya nga grupo nga nagpromisa sa pag-usar sang sakto nga kilohan, kag bisan medyo mahal-mahal gawa ang ila baligya tungod kay honest sila, himuon man nila ini sa gihapon.

Si Elena isa ka government employee.  On time gid sia sa pagreport sa opisina, ginaobserbar gid niya ang sakto nga oras sang ila lunch break, kag waay na siya nagapadugay pa sa pagkata-kata, waay siya nagahatag sing mga pabor kay gina-obserbar gid niya ang first come first serve, kag indi sia madala sa mga lagay.  Sang una damo iya contra nga nahisa sa iya, pero sang ulihi ginsunod man sang tanan ang iya ehemplo.

Paagi sining simple nga mga buhat ini nga mga tawo nangin asin nga nagapreservar sang bilog nga katilingban nga madunot kag magbaho.  They made a difference to their world, even just a small difference and in a way preserved it from total destruction.

Mga utod, ginatawag kita nga mga asin sang kalibutan kay ginatawag kita nga maghatag sing sabor kag magpreserve sang aton palibot nga indi ini magpabilin nga madulom kag madunot tungod sang kalainan.  Kita subong mamangkot, paano kita mangin asin para sa iban - bisan sa gagmay lang nga mga butang?