17th sun B - 1

May isa anay ka tawo nga nagkadto sa kagubatan kag didto nakita niya ang isa ka singgalong nga nabali ang iya sini tiil.  Ang singglong indi makahulag kag indi makalakat, pero bisan amo sini ang iya situwasyon, buhi pa sia kag mapagsik, magluwas lamang sang iya nabali nga tiil.  Ang tawo natingala, paano makakaon ang singalong, kay indi sia makapangayam kay indi gani sia makalakat?  Gani tungod sang katingala nagtener ang tawo nga nagapanago sa pagbantay kag sa pagtukib kon ngaa buhi pa ang singglong bisan amo na sini ang iya kahimtangan. 

Samtang nagahulat sia nakita sang tawo nga may nagapalapit nga tigre sa singgalong kag samtang nagapalapit ini nakita sang tawo nga daw may ginakagat ang ini sa iya baba.  Sang malapit na lang ang tigre sa singglong, nakita sang tawo nga ang ginadala sang tigre sa iya baba isa ka karne sang isa ka sapat nga iya ginpatay.  Kag sa daku niya nga kakibot natalupangdan niya nga ang tigre gali amo ang nagadala sing pagkaon sa singglong – ang tigre amo ang nagapakaon sa singglong.

Aba, siling niya, isa ini ka maalwan nga tigre.  Gani may ideya nga nagsulod sa iya paminsaron.  Mapakunokuno man sia nga nabali man ang iya tiil kag lantawon niya kon bala dal-an man sia sang tigre sang kalan-on.  (Hay tawo gid, buhaton niya ang tanan para libre ang iya pagkaon!)  Gani ang tawo nagpungko sa kilid, kag kon kaisa nagatiabaw man sia kuno abi nga sakit ang iya tiil.  Apang ang tigre waay gani nagsapak sa iya.  Ang tawo waay nadulaan sang paglaum.  Padayon sia nga nagahulat sa tigre nga magadala sa iya sang pagkaon. 

Samtang nagahulat sia natulugan ang tawo kag sa iya damgohanon may isa ka matunog nga tingog nga nagsinggit sa iya dulonggan. “Hoy, sunda ang tigre, indi ang singglong!  Sunda ang tigre, indi ang singglong!”

Sang nabatian ninyo ang ebanghelyo ano ang nagsulod sa inyo pensar?  Siguro nagsiling ang iban sa aton, si Jesus nagpakaon sang linibo ka mga tawo paagi lamang sa lima ka tinapay kag duha ka isda - makagagahom gid man si Jesus.  Makahimo sia sang milagro, mapakaon niya ang mga ginagutom.  Puede man ina siguro nga mangadi na lang kita sa iya agod magahatag sia sa aton sing pagkaon kag gani indi na kita kinahanglan magpangabudlay.  Suli-on ta lang ang aton payong kag sal-on ang nagakataktak nga mga tinapay kag bugas nga iya ipadala halin sa langit.  .

Sang makita sang mga tawo ang ginhimo ni Jesus, indi na sila luyag nga maghalin sa iya kilid.  Siempre may libre nga bugas.  Luyag nila nga mangin hari sia tungod kay luyag nila nga mangin matawhay ang ila pangabuhi.  Apang sang namutikan ini ni Jesus ano ang iya gin-obra?  Si Jesus nalagyo kag nagkadto sa bukid sa pagpanago.  Indi niya luyag ang ila tuyo.

Sunda ang tigre, indi ang singgalong.  Kasubong man sini ang ginasiling sang aton Ginoo sa iya paglakat sa bukid.  Sunda ang tigre, indi ang singgalong.  Sunda ang akon kaayo, indi ang mga Hudiyo.  Sunda ang kaalawan ni Jesus, indi ang ila kadalok.  Sunda ang kaayo ni Jesus, kag indi ang ila luyag nga mangayo na lang sila nga mangayo.

Mga utod, indi kita makabuhat sang mga milagro.  Gabakal man ta sa gihapon sang aton tinapay sa bakery kag nagadalawat kita sa gihapon sang aton bugas.  Indi kita makabuhat sang mga milagro katulad ni Jesus, apang masunod naton ang rason kon ngaa nagbuhat sia sang milagro.  Kag ano ina ang rason?  Nagbuhat sia sang milagro tungod kay naluoy sia kay sila ginagutom na.  Ginpadamo niya ang diutay nga tinapay kay sia nagkabalaka sa ila kahimtangan sang kagutom.  Amo ini ang aton sundon.  Sunda ang iya kaalwan, sunda ang iya kaluoy, sunda ang iya pagbatyag sa mga nagaantus, sunda ang iya pagulikid.  We may not have the power to multiply bread for people who are hungry, for people who are in need, but we can imitate Jesus in his concern, in his love and in his generosity to the hungry and the poor of his time.

Subong tugutan naton ang ebanghelyo nga magtudlo sa aton indi lamang sa pagpangamuyo sa Dios, kundi sa pagsunod man sang kaluoy kag sang kaalwan sang Dios.  Sunda ang tigre, indi ang singglong.  Sunda ang kaayo kag kaalwan ni Jesus, kag indi ang ila kadalok.