16th sun A - 2

Sang didto ako gin-assign sa Pototan ang amon gina-aliali nga pabo nadula.  Ginhawa na namon pangita – dugay man ang amon takol-takol agud makasabat lang sia kag matultulan namon kon diin na sia.  Kinadto na namon sa plaza, sa likod simbahan, sa iskwelahan –waay gid.  Sang ulihi mga dali na lang ugto-adlaw nakabati na lang kami nga nakita kuno ang amon pabo didto sa isa ka balay didto sa squatters area sa likod sang simbahan.  Daku gid ang amon pagpasalamat kag sang ginbaton na namon ang pabo ang amon driver nga nahamtang sa kilid ko nagsiling, “Father maayo lang kay nagtupa ang aton pabo didto sa balay sang isa ka protestante – kon nagtupa to sa katoliko nga balay ginlitson na to kag ginpanyaga.

Sang nagligad nga duha ka tuig naghiking kami upod sang mga semianrista didto sa Bucari sa kabukiran sang Leon.  May isa didto ka baryo nga ginsiling nga pinakalinong sa bug-os nga banwa – sa mga tiyangge waay ka gid may makita nga makahulubog nga ilimnon nga ginabaligya kag waay sigarilyo.  Nag-init ang ulo sang upod ko kay waay gid sia may makita nga sigarilyo sa bilog nga baryo nga napalibutan sang madamo nga mga tiyangge.  Ang yadtong baryo puro protestante.

Sa tuod-tuod lang nagasakit man ang buot ko panganlitan nga mabati-an ko ini nga konklusiyon.  Tungod kay ako pari ginakabig ko nga kabahin ako sang kapalpakan sang aton relihiyon.  Pero ngaa kasubong kita sini.  Indi manegar kadamo sang mga maayo, apang indi man manegar kadamo man sing mala-in nga nagatuga sang madamo nga kamalamalahan indi lamang sa aton katilingban kundi bisan pa sa aton pungsod.

Ang aton ebanghelyo may kasubong man nga obserbasyon – ang trigo kag ang hilamon dungan nga nagatubo sa uma. Kag ang la-in pa diri kay gintugutan sang Dios nga sila nga duha magtubo -–waay niya gingabot ang ang mga hilamon – gintugutan niya ini nga magtubo, mag-upod sa trigo asta sa katapusan kag ugaling ginpanunog.  Evil co-existing with the good.  Ngaa ayhan.

Kada kaon ko sang ginatawag nga mixed nuts nagapadumdum ini sa akons ang akon kaugalingon.  Mix nuts, nagkalainlain nga mga mane, sa isa ka lata, sa isa ka sulodlan.  May ara nga nagustohan ko, may ara nga nala-inan ko.  May ara nga mapait, may ara man nga matam-is.  May ara man nga aplud, apang may maayo man kag manamit.  Mix nuts.  Ako daw isa man ka lata sang mixed nuts.  May mga kala-inan  kag may kaayuhan.  May mga butang nga waay ko naluyagan sa akon kaugalingon, may ara man ako nga nanami-an.  May ara man ako nga ginakangil-aran sa akon kaugalingon, may ara man ako nga ginapabugal nga maayo.  May maayo ako nga katuyuan, apang may mga handum man ako nga malain.  Ang kaayuhan kag kalainan nagaupdanay bisan sa akon taguipusuon.  Ngaa kasubong sini?

Sa tuod-tuod lang ambot. Siguro ang Dios indi man kapilit sa aton nga mangin maayo kita  tanan.  Tanan kita may kahilwayan.  Siguro luyag niya ipakita nga asta sa ulihi ginahatagan niya kita sing kahigayunan nga mag-bag-o.  His patience is always directed to salvation.  Ukon basi may iban pa man siya nga rason.  Apang luyag ko lang pamalandongan ang mga ginasiling ni Jesus sa sini nga mga butang –ano ang himuon naton tungod sang presensiya sang kalainan kag kaayuhan sa aton palibot kag sa aton mismo kaugalingon.  Ang Ginoo nagsiling, indi paggabuta.  Ano ang kahulugan sini?

Kon kaisa tungod sang kadamo sang krimen – halin sa mga haras-haras nga mga driver, hasta sa mga makawat, hasta sa mga hubog kag maoy, hasta sa mga rapist, killers kag hold-uppers kung kaisa kanami panirohon, i-firing squad kag pamatyon.  Apang siling ni Kristo – indi paggabuta.  Do not eliminate sinners, why? Because when you eliminate sinners you may actually be eliminating potential saints.  Ginapatay mo ang kahigayunan nga magbaylo ang iya paginawi –the patience of God is always directed to salvation.  Sin-o lang magdumdum nga si Augustine, Ignatius of Loyola kag si Charles de Foucould mangin santo sa ulihi

Kon kaisa naugot man kita sa aton kaugalingon – ngaa nangakig gid ako man, nagtinguha na ako adlaw adlaw amo man ako sa gihapon; ngaa amo ako sini man.  Jesus said, do not cut kon sayuron pa indi pagpabasula ang imo kaugalingon kay ang kabuhi waay untat nga pagpaninguha nga magpaiway sa sala - asta kita mamatay.  Ngaa? tungod sang mga tentacion kag sang aton pagpaninguha padayon kita nga ginapabakod – where sin abounds grace abounds all the more. 

Si Origen isa sa mga bantog nga manunulat – isa sa mga fathers of the church.  Pero way sia nagsanto.  Ini tungod kay tinak-an na sia sa iya pagpaninguha nga madula niya ini nga tentacion, gani isa ka adlaw gin-utod niya ang iya problema kag waay siya ginkabig nga santo.  Indi pag-utda, indi pag-siloti ang imo kaugalingon, indi pagbasula ang imo kaugalingon kon ikaw mapalta.  Sigiha lang ang pagpaninguha.

Isa kita ka lata sang mix nuts.  Ara gid na sa aton kag sa aton palibot ang kaayuhan kag ang kalainan.  Indi kita magkahadlok kay may katapusan gid ining kalainan kay gindaug sang Dios ang tanan, lakip ang sala.  Good will triumph in the end.