20th sun B - 1

Isa ka adlaw ang Dios nagpahayag sa iya katawhan nga may linog nga matabo.  Kag sa sini nga linog ang tanan nga tubig sa mga bubon, suba kag mga busay madula kay pagasuyupon ini tanan sang duta.  Pagkatapos ang tubig nga maggaguwa kag maga-ilig liwat sa mga suba kag mga bubon magadala sing daku nga kahalitan sa tawo – ang tubig magahimo sa tanan nga nagainom sini nga buang.

Siyempre sa kinaandan ang mga tawo waay namati sa Dios.  Isa gid lang ang namati, ang propeta.  Gani didto sa iya payag payag sa guwa sang banwa naghanda sia para sa adlaw sang linog paagi sa pagtipon sang tubig sa mga drum. 

18th sun B - 2

May isa anay ka tawo ang ngalan niya si Blondin.  Naga-obra sia sa circus, paagi sa pagalatay sa isa ka cable ukon ang ginatawag naton nga tightrope walker.  Isa ka malaba cable nga nahigot sa pinakataas nga bahin sang circus pihak kag pihak, latayon ina ni Blondin nga nagabalanse lamang.  Isa ka bes gintistingan niya ang Niagara Falls, ang isa sa pinakamataas kag pinakalaba nga busay sa America  – halin sa pihak nga pangpang pakadto sa pihak, latayon niya.  Madamo ang naglantaw kag bisan pa makusog ang huyop sang hangin ginlatay ini ni Blondin kag tudo gid ang pagpamalakpak sang mga tawo. 

18th sun B - 1

Duha ka leksiyon. The incapacity to look beyond oneself gikan sa aton nahauna nga balasahon, and the inability to look beyond this life, gikan sa aton ebanghelyo.

First lesson - the incapacity to look beyond oneself ukon self-centeredness. 

Kon kaisa daw nagakatak-an na ako sang pangabuhi ko bilang pari.  Bisan problema sang iban akon pa.  Sa sulod sang duha ka semana puro lang love story ang akon ginaatubang, puro lang gugma ang problema, indi man akon kundi iya sang iban.  Kon kaisa kanami singganon, na kay mapadasodaso ka gid da, mamay mo.  Ugaling indi ka man kasiling sina kay nagahibilibion na sia.  Sa madamo kag mga nagakalainlain nga love story nga nangin problemado nga nabati-an ko, I think isa gid lang ang nagapanginbabaw nga kawsa – ang ginatawag naton nga self-centeredness.  Ang batasan bala nga matyag ko daw ako lang ang tawo sa bilog nga kalibutan, kag ang kalibutan daw dira na lang nagatiyog sa akon.  Hamak mo mamukaw timo tungang gab-i kay indi ka ya katulog kag luyag mo lang magsugilanon, ukon gulpi ka lang mapatawag.  Tapos kon alang-alang gani singganon mo lang, “abi ko love mo ko.”  Sa hunahuna ko lang, kon abu sayaf lang ako, pinugutan ta ka ulo. 

17th sun B - 1

May isa anay ka tawo nga nagkadto sa kagubatan kag didto nakita niya ang isa ka singgalong nga nabali ang iya sini tiil.  Ang singglong indi makahulag kag indi makalakat, pero bisan amo sini ang iya situwasyon, buhi pa sia kag mapagsik, magluwas lamang sang iya nabali nga tiil.  Ang tawo natingala, paano makakaon ang singalong, kay indi sia makapangayam kay indi gani sia makalakat?  Gani tungod sang katingala nagtener ang tawo nga nagapanago sa pagbantay kag sa pagtukib kon ngaa buhi pa ang singglong bisan amo na sini ang iya kahimtangan. 

Samtang nagahulat sia nakita sang tawo nga may nagapalapit nga tigre sa singgalong kag samtang nagapalapit ini nakita sang tawo nga daw may ginakagat ang ini sa iya baba.  Sang malapit na lang ang tigre sa singglong, nakita sang tawo nga ang ginadala sang tigre sa iya baba isa ka karne sang isa ka sapat nga iya ginpatay.  Kag sa daku niya nga kakibot natalupangdan niya nga ang tigre gali amo ang nagadala sing pagkaon sa singglong – ang tigre amo ang nagapakaon sa singglong.

16th sun B - 1

Si Papa Juan XXIII nagpa-obra anay sang isa ka building didto sa Vatican.  Ginpresentar ang plano sa iya.  Ginalantaw ini sang Santo Papa kag pagkatapos sa pila ka minutos ginsulatan niya sa kilid sang plano, non sumus angeli nga kon sayuron indi kami mga angheles, kag binalik ang plano sa mga architect kag ginpaliwat sa ila.  Ang mga architect nagkinarankaran kay luwas nga indi luyag ang Santo Papa sang ila plano indi sila kahibalo kon ano ang iya ginareklamo.  Ang ila lamang makita nga instructions sa ila amo ang mga tinaga sa Latin non sumus angeli, indi kami mga anghel.  Ginbusisi nila ang plano, ginhusisa liwat, nagdebate sila, nagbinaisay sila, pero indi sila maka-agree kon ano gid bala ang diperensya kag kon ano ang ginareklamo sang Santo papa.  Sang ulihi may isa ka architect nga lantaw liwat sang plano kag sa hinali may nasiplatan sia nga indi sakto.  Wala sing banyo ang building.  Non sumus angeli, indi kami mga anghel, nagapangihi kami – diin kami mangihi?

15th sun B - 2

May isa anay ka mataas nga ministro sang hari nga nagbuhat sang indi kontani dapat buhaton sa atubangan sang hari, nagtindog sia kag ginsaway ang hari , naghambal sia sang kamatuoran kag gintudlo niya ang sala nga desisyon sang hari.  Tungod sini naginit ang ulo sang hari sa iya gani ginpaguwa sia sa iya pagkaministro, ginparesign sia kag ginpapuli sa iya balay sa uma.  Swerte lang kay wala sia ginpapatay sang hari.

15th sun B - 1

May isa anay ka bantog nga psychiatrist nga ginahingalanan kay Dr. Karl Menninger.  Isa ka adlaw naghatag siya sang isa ka importante nga lecture sa atubangan sang mga experto sa psychiatry nahanungod sa mental health – sa mga balatian sa ulo.  May isa didto nga nagpamangkot sa iya, “Dr. ano ang iadvise mo nga himuon sang isa ka tawo nga nagabatyag nga daw mahulog siya sa nervous breakdown siya?”  Ang tanan nagexpectar nga ang isabat sang bantog nga doctor amo nga magpakigkita siya sa isa ka doctor ukon sa isa ka psychiatrist kag magpabulong.  Sa baylo ang bantog nga doctor nagsiling:  Singganon mo ang imo pasyente nga magguwa siya sa iya balay, trankahan niya sing maayo ang iya balay, maglakat sa dalan, mangita sang tawo nga nagakinahanglan sang bulig kag himuon niya ang tanan agud mabuligan yadtong tawo.”