boda de oro, bugoy and norma

Isa sa mga nagapasadya kag nagahatag du-ag sa aton kabuhi amo ang mga hitabo nga ayhan nakapadulog sa aton, nakapaliko sa wala ukon sa tuo, mga hitabo nga nakapabalikid sa aton bisan makadali gid lang, kag mga eksena sa kabuhi nga nakapaisol sa aton bisan sing gamay lang gid.  Ang kabuhi nga duloderetso lang, wala prino-prino daw indi gid man masadya.  Sa kabuhi kuno you always take the scenic route.  Mahinay ini nga alagyan pero masadya kag madamo ka madiskubrehan.  Pero kon nagakuyampad ka lang sa dalan, matuod madasig ka maka-abot sa imo kaladto-an, pero ti wala ka man gid nag-enjoy kay naglabay ka man lang.

Ining akon pagmisa kag pagsermon karon nga hapon sa sining ika-lima ka napulo nga pagsukat sang kasal, ang boda de oro ni Liberato kag Norma Jandoquile, isa ini sa mga liko sa akon kabuhi, mga prino nga wala plano, mga dulog nga indi hungod.  Nagkitaay kami ni Nong Bugoy kag ni Nang Norma sang nag-daigon ang mga seminarista sa ila balay.  Sa sadto nga gab-i si Fr. Bong kuntani ang na-assign sa Oton pero gin-ayo ko sa iya nga ako na lang ang sa Oton kag sia sa Guimbal para nga makapangilala ako liwat sa mga taga-Oton kag makasid-ing liwat sa ila balay.  Kay sa pagkamatuod bisan nagdalagko na ang mga balikawang sang tanan, nagtiligulang na, nagpuluti na ang buhok, nabingaw na ang mga unto, familiar pa sa gihapon ang mga guya pero indi ko na mahingalanan.  

misa aguinaldo: diciembre 22

Sa sulod na sang pito ka bulan ginapamalandongan ko ang mga salmo sa pagsabat.  Daw nahimo ko na ini nga panaad.  Actually disiplina ko man ini sa akon kaugalingon agod nga indi ko pagsulit-suliton ang akon sermon kag mapuwersa gid ako magtuon kada adlaw.   

Ginpabasa ko ang aton responsorial psalm pero sa pagkamatuod indi ini psalm kag wala ini ginkuha sa libro sang mga salmo.  Isa ini ambahanon.  Ambahanon ini ni Ana nga isa ka baw-as apang ginbugayan sia sang Dios kag nakabata sia pagkatapos sang malawig nga mga tinuig – ang iya bata amo si Propeta Samuel, ang propeta nga magakonsagrar sang una nga mga hari sang Israel – si Haring Saul kag si Haring David.  Ini nga ambahanon may leksiyon nga magpamati kita sa Dios nga may bukas nga panghunahuna.

salmo 72: ika-2 nga Domingo sang Adbiento A

Sa sulod na sang sobra anum ka bulan ginapamalandongan ko upod sa mga sumilimba ang aton kalantahon sa pagsabat ukon ang mga salmo.  Karon nga aga luyag ko pamalandongan upod sa inyo ang salmo 72.

Ang salmo 72 ginatawag naton nga mga harianon nga mga salmo.  Harianon bangud kay ini nga mga salmo nagasaysay sang kaangtanan sang hari kag sang Dios, kag kon paano nagatuytuy kag nagabulig ang Dios sa iya katawohan paagi sa persona sang hari.  Ang salmo 72 nagahalad sang pangamuyo para sa hari, in particular para kay haring Salomon.  "O Dios tuytuyi ang hari sa paghukom suno sa imo pagkamatarong, ipaambit sa iya ang imo kaugalingon nga katarungan agod magahari sia sing matarong sang imo katawohan kag magagahom sia sing matarong sa mga imol."  Sa padayon mo nga basa sini nga salmo mabatyagan mo pa gid ang katahom sini nga pangamuyo kag ang kaayo sang iya mga hangad para sa hari kag sa iya ginharian.  Apang samtang nagalawig ang imo ginabasa amat-amat mo matalupangdan nga ang mga pangamuyo sining salmo daw indi realistic, nagapalanglapaw bisan ikaw mismo magasiling, daw indi gid ni matabo a.  "Kabay pa nga ang kalaparon sang iya ginharian magahalin sa isa ka dagat tubtub sa isa, ang mga tawo sa desierto magaluhod sa iya, ang mga hari sang Espana magahatag sa iya sang regalo, ang hari sang Etiopia kag sang Arabia, ang tanan nga mga hari, magaluhod sa iya atubangan."  Araw-araw man ini – tanan gid ya.  "Kabay nga sa iya panahon magluntad ang pagkamatarong kag ang kauswagan magpadayon samtang nagasanag ang bulan."  Baw wala gid untat?  Bisan gani ang ginharian sang Roma nalumpag pagkatapos lang sang sobra lima ka gatos ka tuig, kag nahibal-an man naton sa history nga pagkatapos ni Haring Salomon napihak sa gilayon ang ginharian sang Israel bangud sang rivalry sang mga magulolotod.

piesta sa leon: sta. catalina de alejandria

Karon nga aga sa kapiestahan ni Sta. Catalina de Alejandria luyag ko ipropose para sa aton pagpamalandong ang aton kalantahon sa pagsabat, ang responsorial psalm, salmo 84.  Sa sulod na sang sobra anum ka bulan gintinguhaan ko nga pamalandongan ang mga salmo nga ginagamit naton sa misa.  Sa mga balasahon amo ini pirme ang wala ginasapak.  Pero Psalms are prayers and they are prayers par excellence.  Ngaa?  Kay bahin sila sang inspired word, kon sayuron iya mismo sang Dios, kag gani kon aton ini ginapangamuyo we pray with the words of God, with the mind of God, with the heart of God and even with the emotions of God – prayer par excellence.  Nagsugod ining akon pagpamalandong sa mga salmo bilang kuntani maserbi nga reminder sa akon mga superior, padumdum nga medyo lapit-lapit sa protesta, bangud kay tam-an na ako kalawig sa akon assignment sa seminaryo.  Sa kalawigon sang mga tinuig sa seminaryo napamalandongan ko na ang mga ebanghelyo, natapos ko na ang nahauna kag ikaduha nga balasahon, natapos ko na ang weekday readings year 1 and 2.  Subong yara na ako sa salmo, sa kalantahon sa pagsabat.  Kon pananglitan mabati-an ninyo ako pila ka adlaw nga nagawali nahanugnod sang alleluia sang Misa, ay sobra-sobra na gid na ya.  Basi may dala na ako nga placard diri sa pulpito.

romulus kag remus vs pedro kag pablo - btac viejo fiesta 2016

Gintukod ang ciudad sang Roma sang Abril 21 tuig 753 antes natawo ang Ginoong Jesukristo.  Gintukod ini sang duha ka mag-utod, mga kapid nga si Romulus kag Remus.  Ginasiling nga si Romulus kag Remus mga anak sang dios-dios sang giyera nga si Mars kag sang isa ka vestal virgin.  Bangud kay anak sila sang isa ka vestal virgin ginsentensiahan ang kapid nga patyon, apang sa natural lang nga paagi kag nahadlok sila kay Mars.  Ginpaanod ang kapid sa suba sang Tiber sa tuyo nga sila malumos, ukon matugnawan ukon magut-man ukon masapwan kag kan-on sang mga mabangis nga mga kasapatan.  Matuod nasapwan gid man sila sang isa ka babayi nga lobo, isa ka she-wolf, apang imbes nga kan-on sila, iya sila ginsagod kag ginpatiti sa iya mismo nga suso sa sulod sang pila ka adlaw.  Natalupangdan ini sang isa ka manugbantay sang karnero kag iya sila gin-ayop kag ginpadaku.

change is coming - san isidro labrador fiesta zarraga, iloilo

Change is coming.  Basi bala magdumdum kamo nga Duterte ako. Luyag lang ako magpasalig sa inyo nga wala ako may ginkampanyahan, wala ako may ginapinan, wala ko ginasugid-sugid ang akon boto.  Personal ina sa akon, ako lang ang nakahibalo kon sin-o ang akon ginboto, kay bal-an ko amo ina ang ginapaabot ninyo sa amon nga mga pari.  Pero nagsiling ako nga change is coming tungod kay amo ini ang summary sang aton mga balasahon subong.  If the Holy Spirit comes then change is coming.
Sa tatlo naton ka mga balasahon, may tatlo man nga nanarisari nga pagpahayag sang gahom sa Espiritu Santo sa kabuhi sang mga gintuton-an.  Tatlo man ka sahi sang pagpanghikot sang Espiritu.  Apang isa lang ka punto nga komun sa tanan.  Nga sa tagsa ka pag-abot sang Espiritu Santo change also comes, nga sa tagsa kag pagpanghikot sang Espiritu may pagbag-o nga nagakatabo.  Gani, change is coming.  Pahat-pahaton naton ini.

inmaculada concepcion fiesta

Ini nga piesta makasalala.  Gin-test ko anay ini sa klase ko, abi ko maperfect nila, pero may pila ka bilog nga sala.  Amo ini ang pamangkot.  Sino ang ginpanamkon (conceived) karon nga adlaw, si Maria ukon si Jesus?  Sino ang ginadumdum naton nga nanamkon subong nga adlaw si Maria ukon si Ana?

Actually makasalala ini nga piesta.  Ngaa?  Kay sa pagkamatuod si Maria ang ginpanamkon karon nga adlaw nga wala mahilabti sang sala nga panublion.  Ginpanamkon sia sang iya Iloy nga si Santa Ana.  Ginpanamkon sia Deciembre 8.  San-o sia matawo?  Siyam ka bulan - Septiembre 8? 

Si Jesus ginpanamkon ni Maria nga wala mahilabti sang sala sa Marso 25.  San-o sia matawo?  Siyam ka bulan – Deciembre 25.

Fiesta Guimbal, San Nicolas de Tolentino 2015

At one point or another sigurado ako nangayo man kamo sang mga milagro sa inyo kabuhi.  Inang tion bala nga nabutang ka na sa situwasyon nga nahimo mo na ang tanan, apang wala man sa gihapon sang kalubaran ukon alibyo ang problema nga imo ginapangatubang.  Nakaagi man ako sini pero indi gid man siguro pareho ka lala sang iban.  Pero naagyan ko man ang pagkadto sa madamo kag maayo nga mga doktor kag mga ospital diri sa Iloilo kag sa Manila.  Sang wala yadto alibyo kaagi man ako pamanyos gas, ihi (akon, indi iya sang iban), taghok sang kalachuchi, pamanyos ahos, luy-a, panghampol kasla, nagduom man ako liso sang balunggay nga sa pagkapa-it, nakakagto man ako kay Maruicio, buhi pa to sia sang una, sang ulihi sang indi na gid madala nagpabut-but man ako.  Amo na ang rason kon ngaa natak-an gid ako mag-atubang sa mga tawo nga ma-advise-advise sa akon kon ano ang himuon ko sa akon tiil.  Kanami singganon, nahimo ko na ang tanan.  But then that would be rude.  Pero tuod nahimo ko na ang tanan – pati konpesar every other day kay basi tuga ini sang akon sala, ay nahimo ko na, kaluluoy lang to sang una si Fr. Baur sa Santa Maria kag si Fr. Casey sa St. Clement’s.  Then you come to that point nga wala na, I have tried everything, natilawan mo na ang tanan.  Then you give up, kapoy na ako, you surrender, you wait for God to intervene, you pray to God for a miracle, you ask him to come and help you.

epal - 3rd sunday easter B

Luyag ko pamalandongan upod sa inyo ang aton nahauna nga balasahon gikan sa libro sang mga binuhatan sang mga apostoles.  Ini nga balasahon nagasaysay sang sermon ni San Pedro didto sa isa ka lugar sa templo nga ginatawag Portico ni Salomon.

Agod mahangpan naton ang sermon ni San Pedro, hibaluon naton anay kon ano ang konteksto sini. 

Si Pedro kag si Juan nagkadto sa templo kag didto may nagapakilimos sa ganhaan nga ginatawag matahom.  Si Pedro nagsiling "Wala gid ako sing kuwarta, pero ihatag ko sa imo ang yari sa akon: sa ngalan ni Jesukristo nga taga-Nazaret, tindog ka kag maglakat!"  Kag ang nagapakilimo nga piang halin pa sa iya pagakatawo nakalakat kag nagtumbo-tumbo.  Ang mga tawo natingala sa sini nga hitabo.  Sarang maayo ang napiang, ang nabali, ang gina-arthritis, apang ang piang halin pa sa iya pagkatawo indi maayo.  Gani ang tanan natingala gid, nagdinaguso sila sa ginhamtangan sang mga apostoles kag nagtulok sila kay Pedro kag kay Juan.  Kag si Pedro nagsiling sa ila, “Mga taga-Israel, ngaa bala natingala kamo sini? Ngaa nga ginatulok gid ninyo kami? Nagahunahona bala kamo nga napalakat namon ini nga tawo paagi sa amon gahom ukon pagkadiosnon. Ang Dios ni Abraham, ni Isaac kag ni Jacob, ang Dios sang aton mga katigulangan naghimaya sa iya Alagad nga si Jesus.”  Kag diri nagsugod ang aton nahauna nga balasahon kon sa diin ginpakilala ni Pedro si Jesus sa mga tawo.  Do not look at us, do not focus your attention on us - look at Jesus.

San Jose, Piesta sa Salngan, Passi

May duha ka bersyon ang istorya sang pagkatawo ni Jesus, duha ka pagsaysay sang isa lang ka hitabo – ang bersyon ni San Lucas kag ang bersyon ni San Mateo.  Isa lamang ini ka istorya, apang ginkuha ini sa duha ka eksperyensiya – ang eksperyensiya ni Jose kag ang eksperyensiya ni Maria.

Ang bersyon nga mabasahan naton kay San Lucas naghalin sa panan-aw ni Maria.  Ginasaysay sa aton kon ano ang natabo sa iya sa pagtunda sang anghel, ang iya paminsaron kag balatyagon samtang nagakatabo ini, ang iya pagkatublag, ang iya mga pamangkutanon, kag sa ulihi ang iya pagpasugot.

panaad - piesta sa tigbauan 2015

Sang bata pa ako tungod kay pirme lang ako nagamasakit, pirme lang kami nagakit-anay sang doctor kag sang manugluy-a, ginpanaad ako sa Sto. Nino sang Tigbauan.  Kada tuig nagasimba ako diri kag nagasindi sang candela dira sa likod kon sa diin nahamtang ang Sto. Nino.  Sang nagsulod na ako sa seminaryo, bangud kay indi na ako makaguwa, may ginasugo lang si lola kada tuig, nga magasimba para sa akon kag magasindi sang candela.    Bangud man sini nga panaad siguro sang naga-idad ako six or seven years old ginpabayuan ako ni nanay ko nga isa ka Sto. Nino kag ginpaprosesyon didto sa akon parokya sang Oton. Nakabayu ako puti, may kapa nga pula nga may ingatinggat – binakal sa aldequer,  may korona sa ulo – indi ini Florete ukon Caperonce kay man lata man lang ini nga ginsolo-solda sang panday; may kalibutan sa akon tuo – ginpintahan nga alkansiya nga paya; may sceptre sa akon wala, may mga angheles sa akon atubang kag may banda sa akon likod.  That was the closest thing I got to being treated as a royalty.   Kag dugang dira if my memory serves me right that was the last time nga gintawag ako sang mga tawo nga cute – after that wala na gid.  We go to these extremes agod matuman ang panaad.   

ang gugma tulumanon - piesta sa layog, maasin 2015

May na-istorya ako anay nga nagasugba sing mais didto sa calle real.  Wala sia nakakilala nga pari ako.  Namangkot ako, Manang nakasimba ka na?  Nagsabat sia, sige kuyab sang mais, makapangadi man ako diri, ngaa masimba gid ako?  May punto sia, indi bala?

May isa man ako nga nakilala nga namangkot kon bala puede lang nga makasimba sa telebisyon ukon sa radyo?  Magluwas nga indi ka na maghalin sa imo balay makapangadi pa ikaw sing mas matawhay, makapamati nga wala sing disturbo, kag indi ka na maggasto plete ukon gasolina.  May ginamisahan gani ako anay sa squatters area didto sa ciudad.   Ang chapel nahamtang sa tunga sang mga naga-ilikit-ikit lang nga mga balay.  Gani ang iban sa ila kon magmisa, nagapabilin lang sa ila balay kag mamintana, nagasuksuk lang sa gihapon sang ila duster kag magsimba.  Isa lang ang desbentaha sini nga situwasyon – indi ka makakalawat. 

ang tanda sang krus ... 29th sunday A 2014 sa Badu, Calinog

Kon madumduman ninyo sa pagbunyag, ang una gid nga ginabuhat sang pari, sang mga ginikanan kag sang maninoy kag maninay amo ang pagmarka sa Krus sa agtang sang bata kag gina-updan ini sang mga tinaga sang pari nga nagasiling, gina-angkon ko ikaw para kay Kristo.  Gina-angkon, kon sayuron si Kristo na ang nagapanag-iya sa imo.

Kon may tagumatayon sa aton panimalay ginasingganan kita sang simbahan nga magtipon sa pagsindi sang candela kag sa pagpangamuyo sing tingob.  Pananglitan mabugtu-an na sing ginhawa, isa-isa nagakadto kita sa minatay kag sa liwat, sa katapusan, ginapat-inan naton sang krus ang iya agtang.  Ginapadumdum naton sia kag ang tanan nga nagapalibot sa iya, malaut man ukon maayo, nga indi ninyo matandog ang iya kalag kay ini ginapanag-iyahan na ni Kristo.

una uni ... tantum quantum ... piesta sa carles 2014

Ginasiling nga ang kabuhi nagakatabo sa masami sa mga lang-at sa aton matag-adlaw nga pangabuhi.  Real life happens many times sa mga interruptions kag indi sa regular nga routine sang pangabuhi. 

Ang problema kada adlaw na ya, indi bala?  Ang katungdanan kada adlaw na ya, indi bala?   Ang opisina, ang iskwela kada adlaw na ya, indi bala? Ang piesta kis-a lang ni ya, isa sa isa ka tuig, gani mamiesta kita.  Siling sang mga komentarista isa ini ka butang nga na miss ni Marta.  Na wrong timing sia.  Na miss niya yadtong kuntani lang-at sa iya matag-adlaw nga pagginawi, nga imbes nga mangusina sia kuntani gin-enjoy niya ang tumalagsahon nga presensya sang Ginoo sa iya puloy-an.  Indi man kada adlaw nga ginabisitahan sila ni Maria sang Ginoo.  Amo lang gid to nga adlaw samtang naglabay si Jesus sa iya panglaktaon padulong sa Jerusalem. Na miss ni Marta ang lang-at.

kwarta .... piesta sa alimodian 2014

Subong pagahambalan naton kwarta, nagatagingting kag nagaragomo nga kwarta.  Galing kon nagatagingting kon sayuron sinsilyo.  Pero, interesting indi bala?  Kwarta.  Siling sang isa ka pari, isa ka commentator sa biblia, nagsiling sia nga ang simbahan kuno pirme lang nagahambal parti sa sex, nga kon lantawon mo wala man gid madamo nga ginhambal si Jesus parte sa sex.  Pero talagsa lang ang simbahan nagahambal nahanungod sa kwarta nga si Jesus masami ukon at least sa pila ka beses naghambal parte sa kwarta.  Kag dugang pa diri, sa talagsa kag malaka nga nagahambal ang Simbahan parte sa kwarta ini may kaangtanan pirme sa paamot ukon fund raising.  So subong we talk about money pero wala amot, kon may aramutan gid man nahimo na naton ina antes piesta I suppose, but nevertheless today we will talk about money.  What does Jesus say to us about money, ano ang ginatudlo ni Jesus sa aton nahanungod sa kwarta?  As Christians how do we make decisions regarding our money?

prayer = we speak to god, god speaks to us..... piesta sa duenas 2014

Ang monghe nga si Pelagius nga nagtudlo nga wala sing sala nga palanublion kag tanan kita maluwas bangud lamang sang aton pagpaninguha bisan pa wala ang grasya sang Dios, nakatilaw gid sing bantug nga kaakig ni Geronimo nga nagsiling sa iya – “na kay man ang imo pamensaron nadulman tungod kay natam-an ka kaon sang linugaw kag nagrarapot ini sa imo utok.”  Ang mga pari sa Roma nga mahilig magpatubo sang bungot pinaagyan man niya nga nagasiling, “kon ang pagkabalaan yara sa bungot ang pinakabalaan sa tunga naton amo ang kanding.” 

Actually nalingaw ako basa kay Geronimo tungod kay nami gid sia manuya - ina kon indi ikaw ang natungdan (wala man ko ya bungot.) 

ang langit amo ang padulungan .... piesta sa sta. teresita 2014

Ang pamangkot amo sini:  ngaa namangkot ang mga paostoles sina nga pamangkot, ngaa may kasubong sila nga pamangkutanon?  Sin-o ang labing daku?  Ano ang ginhalinan sina nga pamangkot?  Ano ang nag-trigger sa ila sa pagpamangkot kon sin-o sa ila ang labing daku? 

Sa psychology subong ukon sa counselling nagapamangkot ang counsellor, where is that coming from?  Where are you coming from?  Diin ina nga panghunahuna nagahalin, diin ina nga balatyagon nagahalin? kay sa pagkamatuod bisan sa ano man lang nga bagay kon indi kita mamangkot sini we will end up addressing the symptoms but not the cause, mapauntat naton ang ubo nga amo ang simtoma pero wala naton gin-ayo ang TB ukon worse ang Pneumonia nga amo ang kawsa.

So diin ina naghalin nga pamangkutanon, who is the greatest?

ano ang importante? piesta sa cagbang, oton 2014

Si Jesus sa iya pangamuyo sa aton ebanghelyo nagsiling, “Nagapasalamat ako sa imo O Amay, tungod kay gintago mo ini nga mga butang sa mga maalam kag may tinun-an, kag ginpahayag mo sa mga kabataan. Si Jesus wala nagsiling ginpahayag mo sa mga mango, ukon sa mga buang-buang.  He did not say thank you for revealing it to foolish people, sa baylo nagsiling sia “kay ginapahayag mo ini sa mga kabataan.” 

Ang pamatasan nga ginapasalamatan ni Jesus sa Amay amo ang pamatasan sang bata nga hapos tudlu-an.  Lain ini sa pamatasan sang mga fariseo nga kabudlay tudlu-an, kabudlay giyahan, kabudlay pa-intiendihon, indi tungod kay mango kundi tungod kay kadamo sang nagapamalabag sa ila pagpamati sa iban – posible nga ini bugal, posible nga ini katamad, posible nga ini bias. 

dumduma ...fiesta sang estancia 2014

Sang Pebrero 25 ang akon iloy na-hospital kay gin-stroke, mild stroke man lang kontani.  Pero amo yadto ang iya ulihi nga pagpa-ospital although wala gid ako nagpaabot nga mapatay sia exactly one month later sang Marso 25.  Sang didto sia sa ICU, ginbisitahan ko sia kada adlaw kag natalupangdan ko nga daw nagakadula na ang iya mga memorya, madamo na ang indi niya madumduman.  Gani sa isa ka pagbisita ko ginpamangkot ko sia, “Ma, kilala mo ako?”  Abtik sia nagsabat, “huo e.”  Indi ako konbinsido.  Gani namangkot ako, “ti, Ma sin-o ako?”  Gintulok niya ako sing dugay, gintulok ko man sia sing dugay agod mahimutadan niya ang akon guya.  Kag nagsiling sia confidently, “Ikaw si Fr. Butch.”  For your information si Fr. Butch amo ang chaplain sang Doctor’s Hospital kon sa diin sia na-confine.  “Ma, indi ako si Fr. Butch, si Fr. Andy ako.”  Kag ang masunod niya nga sabat amo ang bombshell.  Sinabat niya ako, “indi ka ya si Fr. Andy kay ka guapo sa imo.”  Sang sinugid ko ni sa akon mga utod, nagbinaisay kami kon ano ang buot niya silingon, guapo gid man bala si Fr. Butch sang sa akon, ukon mas guapo ako kag indi lang sia kadumdum nga ako gali si Fr. Andy.  Wala ko na ginpadalman pa.  Ginbaton ko na lang ang ikaduha nga sabat.

investiture sang altar boys 2010

Subong nga adlaw ang aton mga mass servers masukloban sang mga panapton nga magapakita sang ila hilikuton sa pagtipon sang kristiano nga katilingban sa santos nga misa.  Ini nga mga panapton magapadumdum sa ila sang ila katungdanan kag subong man sang aton pagpakamahal sang santos nga misa.

Kon manutahan ninyo ini nga mga bayo indi ordinaryo.  Kon maglagaw kay sa SM nga amo sini ang imo ginasuksuk masal-an ka gid nga buangit.  Ngaa, tungod kay indi ini ordinaryo nga panapton nga ginagamit sa ordinaryo nga hilikuton.  Ang sutana ninyo amo ang pinasahi nga panapton nga ginagamit sa pinasahi nga hilikuton.  Amo ina ang pagkabig naton sang santos nga misa nga inyo pagaserbihan - isa ini ka pinasahi nga hilikuton nga nagakinahanglan sang pinasahi nga panapton.  Kabay pa nga amo ini ang inyo pagkabig man sa santos nga misa - isa ka pinasahi nga hilikuton, nga nagakinahanglan sang pinasahi nga panapton kag labaw diri kag dugang diri sang isa pinasahi nga disposisyon.  Bisan ang imo panglakat sa misa indi pareho sang imo panglakat sa plaza, ang imo panghulag kag pagginawi sa santos nga misa indi pareho sang imo panghulag kag pagginawi sa iskwelahan ukon sa komputeran.  Isa ini ka pinasahi nga hilikuton nga nagakinahanglan sang pinasahi nga disposisyon nga ginasimbolo, ginatanda sang imo pinasahi nga panpton.

Ngaa pinasahi?