inmaculada concepcion fiesta

Ini nga piesta makasalala.  Gin-test ko anay ini sa klase ko, abi ko maperfect nila, pero may pila ka bilog nga sala.  Amo ini ang pamangkot.  Sino ang ginpanamkon (conceived) karon nga adlaw, si Maria ukon si Jesus?  Sino ang ginadumdum naton nga nanamkon subong nga adlaw si Maria ukon si Ana?

Actually makasalala ini nga piesta.  Ngaa?  Kay sa pagkamatuod si Maria ang ginpanamkon karon nga adlaw nga wala mahilabti sang sala nga panublion.  Ginpanamkon sia sang iya Iloy nga si Santa Ana.  Ginpanamkon sia Deciembre 8.  San-o sia matawo?  Siyam ka bulan - Septiembre 8? 

Si Jesus ginpanamkon ni Maria nga wala mahilabti sang sala sa Marso 25.  San-o sia matawo?  Siyam ka bulan – Deciembre 25.

Pero subong sa pagpanamkon kay Maria ni Sta. Ana, ang aton ebanghelyo pagpanamkon kay Jesus ni Maria.  Makasalala indi bala.  Nagasinamo na ang tanan. 

Pero sa tunga sini tanan kon isummarize naton ang istorya ano gid bala ang Inmaculada Concepcion?  Ano gid bala sa simple nga pagpahayag ang istorya kag kahulugan sang Inmaculada Concepcion?

Sa simple nga pagpahayagistorya ini sang sala, istorya ini sang pag-antus nga gintuga sa aton sang sala; istorya ini sang kaluoy sang Dios, ang kaluoy nga mas makagagahom pa sang sa sala.

Kahapon kon nakasimba kamo katahom sang aton ebanghelyo nga sarang naton maggamit agod mahangpan naton ang kaluoy sang Dios kay Maria bangud kay ginhimo sia nga wala mahilabti sang sala nga panublion. 

Ang ebanghelyo kahapon amo ang pagdala kay Jesus sang isa ka paralitiko.  Gindala sia sang iya mga abyan, kag bangud tam-an kagutok, ginbuksan nila ang atop sang balay kag didto sia ginpa-agi.  Gin-ayo sia ni Jesus nga nagasiling, “Tyoy ginapatawad ang imo sala.” Si Jesus wala nagsiling, mag-ayo ka.  Si Jesus wala nagsiling tindog ka kag maglakat, at least wala sia anay nagsiling sina.  Sa baylo nagsiling sia, ginapatawad ang imo mga sala. 

Sa iya komentaryo si San Juan Crisostomo nagsiling, “tapnaon anay ang tuboran sang kalautan, kag nian ang tubig sang mga balatian maga-untat sa pag-ilig.” Ngaa ginapatawad anay ni Jesus ang mga sala sang paralitiko, ngaa wala na lang niya gin-ayo diretso. “Tapnaon anay ang tuboran sang kalautan, kag nian ang tubig sang mga balatian maga-untat sa pag-ilig.”

Sang nagligad nga mga is aka tuig ang nagligad ang mga dose anyos nga grade 7 nga mga seminaristas nagkinarankaran kay ang gripo sa ila banyo nabali kag nagsinagawak ang tubig.  Tungod kay nahadlok sila nga basi mag-awas ang tubig sa salog nga kahoy sang ila dormitoryo, kag basi magtulo pa gid ini sa idalom sa kisame sang auditorium, dali-dali man sila tanan haw-as sang tubig gikan sa salog sang banyo.  Pag-abot sang ila mga magulang, mga Grade 10, may isa sa ila nga nagkadto sa gripo nga naga-awas, ginpangitaan sang supon kag iya anay ginsupnan ang na-utod nga gripo kag ugaling ginpahubsan ang baha sa salog.  Kag nian nasolbar ang problema.

Tapnaa anay ang kawsa, kay-oha anay ang tuboran, supni anay ang na-utod kag naga-awas nga tubo, kag nian maga-untat man ang pag-ilig sang tubig sang balati-an.  Amo yadto ang rason kon ngaa ginsingganan ni Jesus ang paralitiko – ang imo sala ginapatawad antes ang balati-an gin-ayo. 

Amo man ini ang ginasaysay sa aton sang Inmaculada Concepcion.  Si Maria ginpanamkon nga wala mahilabti sang sala nga panublion – ang tulo ginkay-o, ang na-utod kag naga-awas ginsupnan, ang tuboran gintapna, agod ang Anak nga si Jesus nga magawala sang mga sala sang kalibutan indi matandog sang sala.  Kag nian dira kay Jesus kag paagi lamang kay Jesus ang sala mapa-untat kag matapna.

In deciding to save humanity the first act of God’s love and mercy was to address the source of all our sufferings – sin.  God has to fix the leak. God has to remove the fountain of evil so that the waters of suffering will stop. This is what God did to Mary.  In Mary God has shown that his mercy can put a halt to sin.  God can stop sin.

Kadamo sang mga pag-antus sa kalibutan nga gintuga sang sala.  Ngaa abi may problema kita sa gutom kag subong man may problema sa tuman katambok ukon obesity.  Ngaa may problema kita sa malnutrition bangud sang kakulang sa pagkaon, apang may problema man kita sa sobra nga paninga-on – sobra nga kaon sang tam-is, sobra nga kaon sang cholesterol, sobra nga kaon sang uric acid – kakulang on the one hand, sobra on the other hand. 

Ang gutom sa sining kalibutan tuga indi sang kakulang sa pagkaon kundi bangud sang indi sakto nga pagbaki-baki agod makakaon ang tanan.  Siguro tuga ini sang kadalok, ukon sang kakulang sa kaalwan; siguro tuga ini sang kakulang sa pagpugong sang kaugalingon ukon sang pagpamilak kag kahakug bangud ayhan sang walay pagbatyag sa kinahanglanon sang iban.  It can be this or all of these but we can never blame hunger because the world lacks food.

Diin nagahalin ang pag-antus?  Sa sala.  Ang pagpangawat, ang kahisa, ang kasakon nga nagatuga sang away sa tunga sang mga politico kag sang duha ka panimalay, ang pagguba sang aton mga kabukiran kag sang aton palibot, ang pagguba sang aton kadagatan – ini tanan mga sala nga nagatuga sang pag-antus sa aton kalibutan.  Tapnaa ang tuboran sang kalautan kag maga-untat man ang pag-ilig sang tubig sang gutom kag balati-an.  Amo ini ang ginapakita sang kaluoy sang Dios dira kay Maria sang sia ginhimo sang Dios nga wala mahilabti sang sala nga panublion. 

Karon gid nga adlaw ginabuksan sang santo papa ang balaan ang puertahan sang Balaan nga Tuig.  Sa iya pagbukas sini ginapaalinton sa aton nga nagasugod na ang Year of Mercy.

Ano ang kaluoy?  May nakita ako nga is aka matahum nga definition sang kaluoy.  Ang gugma kon masumalang niya ang pag-antus nahimo ini nga kaluoy.  When love encounters suffering, love become mercy.  Sang nakita sang Dios ang halit sang sala sa iya katawohan ang iya paghigugma nangin kaluoy.  Amo ini ang Inmaculada Concepcion.

Kon ang bugal akg kaakig yara sa aton, kon yara kita sa sala kita man nagaantu.  Sa atubangan sang Dios ining pag-antus sang makasasala changes his love into mercy.

 Kita man ginatawag nga kon masumalang naton ang pag-antus sang aton isigkatawo, ang aton gugma magahimo sa aton nga maluloy-on, kag nian magtinguha nga mapa-untat ang gahom sang sala snga nagadulot sang madamo nga mga pag-antus.

Ginsaysay sa aton sa sining piesta sang Inmaculada Concepcion ang gahom sang sala, ang iya sini halit nga nagadala sang pag-antus sa mga tawo.  Apang labaw diri ginpakita man sa aton ang kaluoy sang Dios, ang kaluoy nga mas makakagahom pa sang sa sala, sang sa pinakadaku nga sala.  Kabay pa nga magkari kita kag magpalapit sa kaluoy sang Dios.  Kabay pa nga kita man magmangin maluloy-an sa aton isigkatawo.